Abenduaren 27tik aurrera eskuragai egongo dira Pirritx, Porrotx eta Marimototsen saiorako sarrerak
Ikuskizuna urtarrilaren 4an izango da. Udalak hiru sarrera bikoitz zozkatuko ditu sare sozialen bitartez.
Pirritx, Porrotx eta Marimotots pailazoen Ez gara jaitsiko! ikuskizuna egongo da Ondarroan urtarrilaren 4an, 18:00etan, Zaldupe udal kiroldegiko kantxan. Udaletik jakinarazi dutenez, ikuskizunerako sarrerak abenduaren 27tik 29ra egongo dira eskuragarri.
Ikuskizuna Leire Bilbao ondarrutarraren hitzetan oinarrituta dago eta sarrerak eskuratu nahi dutenek Turismo Bulegoan erosi beharko dituzte, bulegoaren ordutegian: 11:00etatik 14:00etara eta 17:00etatik 19:00etara. “Bai ikastetxeetan izena eman duten herritarrek eta baita izena eman gabe erosi nahi dituzten herritarrek ere”. Sarreraren prezioa, ohi legez, 5 eurokoa izango da.
Aurreratu dutenez ikusleek bi aukera izango dituzte sarrerak aukeratzeko orduan: kantxako sarrerak edo harmailetakoak. “Ikastetxeetan erreserba egin baina aipatutako hiru egun horietan Turismo Bulegoan jasotzen ez diren sarrerak publiko orokorrarentzako salmentara aterako dira”. Udaletik zehaztu dutenez, ahalik eta ume gehienek ikuskizunaz gozatzeko aukera izateko asmoagaz, hiruzpalau umeko heldu bat joatea gomendatzen dute. “Salduko diren sarrerez gain, Ondarroako Udalak hiru sarrera bikoitz zozkatuko ditu sare sozialen bitartez”.
