Barikura arte eman daiteke izena Markina-Xemeingo Landare Azokan
Otsailaren 10ean egingo dute Landare Azoka, 10:00etatik 14:30era arte.
Markina-Xemeingo Landare Azoka ospatuko dute beste behin ere, eta aurtengoan, otsailaren 10ean jarri dute hitzordua. Herriko kaleak landarez beteko dira 10:00etatik 14:30era eta mota guztietako landareak erosi edo ikusi ahal izango dituzte herritarrek nahiz inguruko herrietakoek. Udalak adierazi duenez, iazko antzera, aurtengoan ere 20 postutik gora esleituko dituzte, eta landareez gain, bestelako produktuak ere egongo dira.
Postua jartzeko eskaera epea urtarrilaren 10ean amaitzen zen arren, beste bi egun gehitu dituzte, eta beraz, barikura arte [urtarrilak 12] egin ahalko da eskera. Postua jarri nahi dutenek eskaera orria eta dokumentazioa aurkeztu beharko dituzte Markina-Xemeingo Udaleko Berton bulegoan edo udala@markina-xemein.eus helbide elektronikoan. Adierazi dute ez dutela epez kanpo aurkeztutako eskaerarik onartuko.
Artisau, landare haztegi edo mintegiak nahiz ekoizleak aurkeztu daitezke, baina, landare azoka izanik, landare mintegi eta haztegiek lehentasuna izango dutela azaldu dute. Gaineratu dutenez, postuen kopurua mugatua izango da. Oinarrietan adierazi dituzten irizpideen araberako balorazioa egingo dute, eta honela banatuko dituzte ekoizleen postuak: esnekientzako bost postu, ortuarientzako bi, ogi eta gozogintzarako, haragikinetarako eta kontserbetarako hiruna, eta bana, berriz, ahateki, ezti, arrautza eta edarientzat.
Beste hainbat irizpideren artean, emakumeen presentzia bermatzeko asmoz, emakume baserritarra izatea edo titularra emakumezkoa izatea ere kontuan hartuko dute. Horrez gain, nork bere etxaldean sortutako lehengaiak erabiltzeak eta kalitateko marka babestua izatea ere baloratuko dituzte. Gainera, kutsadura ekidin eta jasangarritasuna bultzatzeko asmoz, ingurumenarekiko jasangarritasun irizpideek ere garrantzia edukiko dute postua esleitzerako orduan.
Helburu argia. Udalak adierazi duenez, “Lea-Artibai eskualdean lehen sektoreak orokorrean eta lurreko produktuek izan duten eta daukaten garrantzia kontuan izanik”, herritarrei produktu hauek ezagutarazi eta hurbiltzeko asmoz, ezinbestekotzat jo dute horrelako ekimenak antolatzea. Lehen sektorea “garrantzitsua” dela ulertzen dutela adierazi dute udaleko ordezkariek, bai ekonomiarentzat nahiz “inguruenarekiko errespetuarentzat, kontsumo jasangarriarentzat eta biztanleriaren osasunarentzat”. Beraz, lehen sektorea “funtsezko sektore izanda” bere bideragarritasunean laguntzeko hainbat ekimen eramaten dituzte aurrera, tartean, azokak.
