Martxan dago 2024ko Peru Abarka album lehiaketa
Idazleek martxoaren 8ra arte aurkeztu ditzakete lanak; irabazle bakarra egongo da eta lana album formatuan argitaratzeaz gain, 2.000 euroko saria jasoko du. Ostean, narrazio onena ilustratzeko lehiaketa egingo dute.
Urtero bezala, badator aurtengoan ere Markina-Xemeingo Udalak antolatzen duen Peru Abarka album lehiaketa. Ohi bezala, lehiaketa bi ataletan banatuta egongo da: narrazio onena aukeratzeko lehiaketaren ostean, narrazio hori ilustratzeko proposamenik onena aukeratuko da. Lehiatzaile guztiak 18 urtetik gorakoak izan beharko dira, eta bakoitzak bina lan aurkeztu ditzake. Idazlan bakarra sarituko dute, eta lana album formatuan argitaratzeaz gain, 2.000 euroko saria ere eskuratuko du.
Gutxienez 11.000 eta gehienez 15.000 karaktereren arteko lanak egin beharko dituzte idazleek, espazioak barne. Horrez gain, lanak euskara batuan aurkeztu beharko dira, prosaz zein bertsoz. Gai libreagaz, ipuin originalak, argitaratu gabeak eta beste inongo lehiaketatan saritu gabeak izan beharko dira.
Lanak DIN A4 tamainako orrietan aurkeztu beharko dira, ordenagailuz eta alde bakarretik idatzita. Lerrotik lerrora 1,5eko lerro tartea utzi beharko da eta 12 puntuko tamainagaz Times New Roman letra mota erabili beharko da. Orrialdeak zenbatzeaz gain, guztietan adierazi beharko da lanaren izenburua.
Kopia bakarra aurkeztu beharko da, gutun azal itxi batean. Egilearen izenik barik, gutun azalean titulu edo ikurritz bat jarri beharko du idazleak, eta baita lanaren orri guztien buruan ere. Horrez gain, titulu edo ikurritz berbera duen beste gutun azal bat sartu beharko da egilearen datuekin: izen-abizenak, telefono zenbakia, helbide elektronikoa, jaiotze-data, helbidea eta Nortasun Agiriaren kopia bat.
Lanak Markina-Xemeingo Udalaren Erregistro Orokorrean aurkeztu daitezke, bai eta ondorengo helbidera postaz bidali ere: Markina-Xemeingo Udala, Peru Abarka Album Lehiaketa 2024, Goiko Portala 3, 48270 Markina-Xemein, Bizkaia.
