Zabalik dago taberna eta denden mozorro lehiaketan izena emateko epea
Markina-Xemeingo Udalak eta Hemen Be Bai merkatari elkarteak antolatu dute. Izen ematea zabalik dago eguaztenera [otsailak 7] arte. Gaztetxo eta nagusientzako mozorro lehiaketa ere egingo dute.
Aratusteetan ere herriko dendari nahiz tabernariak jaiaren parte izan daitezen Markina-Xemeingo Udalaren eta Hemen Be Bai merkatarien elkarteak elkarlanean mozorro lehiaketa antolatu dute. Taberna eta denden arteko mozorro lehiaketa izango da, eta parte hartzeko beharrezkoa izango da izena ematea eguaztena [otsailak 7] baino lehen, udaletxeko Berton bulegoan.
Bi kategoriatan banatuta emango dituzte sariak: tabernarien saria eta dendarien saria. Batean nahiz bestean, 150 euroko saria irabaziko dute.
Oinarriak. Gaia librea den arren, saria irabazteko hainbat oinarri zehaztu dituzte. Tabernen kasuan atonduta egon beharko dira gutxienez otsailaren 11n egun osoan, eta denden kasuan, erakusleihoa atonduta eduki beharko dute eguenetik [otsailak 8] zapatura [otsailak 10]. Azaldu dutenez, hainbat puntu baloratuko dituzte, besteak beste: dekorazioa, egindako lana, originaltasuna eta jaiaren parte izatea.
Mozorro lehiaketa. Taberna eta denden arteko mozorro lehiaketaz gain, gaztetxoen eta nagusien mozorro lehiaketa ere egingo dute. Bakarka edo binaka aurkezten diren 17 urtetik beherakoen artean hiru sari banatuko dituzte: 50 euroko bonoa, 60koa eta 70ekoa. Taldeka aurkezten direnen artean, berriz, bost sari banatuko dituzte: 50 euro, 60 euro, 80 euro, 100 euro eta 120 euro.
Banaka edo binaka aurkezten diren 18 urtetik gorakoen artean, berriz, 70 euroko bonoa, 80 eurokoa eta 90 eurokoa banatuko dituzte; taldekakoek, berriz, 50 euro, 80 euro, 100 euro , 120 euro eta 150 euro irabazteko aukera edukiko dute. Azaldu dute saria jaso ahal izateko gutxienez goizeko desfilean parte hartu beharko dela, mozorro estatikoak edo arrazoi jakinengatik desfilean parte hartu ezin dutenak salbuetsiz.
