Andraetxeko emakumeak "gogotsu" eta "pozik" daude lehenengo batzarrean hartutako erabakiekin
Barikuan [otsailak 2] Lekeitioko 45 emakume elkartu ziren Andraetxean. Aurretik "erronka asko" dituzten arren, datorrenari heltzeko "gogotsu" amaitu zuten batzarra.
Andraetxeko bazkideek lehenengo elkargunea egin zuten barikuan [otsailak 2]. Urteko helburuak zehazteko gaur egun diren 77 bazkidetatik 45 elkartu ziren bertan, eta “gogotsu” amaitu zuten batzarra: “Erronka asko ditugu aurretik, baina orokorrean pozik gaude batzarraren helburuak bete zirelako”.
Elkargunea egin aurretik galdetegi bat zabaldu zuten bazkideen proposamenak batu eta horren gainean lanketa egiteko. Hori horrela, elkargunean emakumeentzako erreferentziazko espazio bihurtzeko helburua finkatu zuten: “Horrez gain, beste urteko helburuetako bat izango da bazkide gehiago egin eta aniztasuna lortzea, bai adin aldetik eta baita profil aldetik ere”.
Bestalde, bazkideen artean zabaldutako galdetegi horren bitartez urteko formazioei dagokien hiru erabaki hartu zituzten: “Alde batetik, eraso sexisten aurrean egin beharreko kudeaketaren inguruko formazioa behar dugula ondorioztatu genuen. Txandak egiten hasiko gara eta Andraetxera etorri daiteke erasoa jasan duen emakume bat. Gu oraintxe bertan ez gara prest ikusten hori guztia kudeatzeko, eta beraz, erasoak kudeatzearen inguruan formazioa behar dugu”.
Horrez gain, bizikletak konpondu, kotxeko gurpilak aldatu, iturgintzari lotutako lanak, eta mota horretako beste hainbat lan egiteko ere formazioa eskainiko dute. Azkenik, feminismoen inguruko formazioa ere jasoko dute: “Feminismoak, pluralean. Pertsonen inguruko formazio bat jaso nahi dugu. Momentuz Andraetxea izena erabaki da, baina, egia da ‘pertsona feminista’ horren inguruko formazio horrek eragin dezakeela izena aldatzea, baina momentuz Andraetxea utziko dugu, formazioa egin eta beste ondorio batzuetara heldu arte, gutxienez”.
Andraetxea txiki geratu zitzaien bazkideei. Argazkia: Andraetxea.
Zailtasunak. Hainbat erabaki hartu eta datorrenari heltzeko gogoz dauden arren, Andraetxeko kideek azaldu dutenez zailtasunak ere izan zituzten batzarra aurrera eramateko: “Alde batetik, goiko gelako obra egiteko dagoenez gaur eguneko elkargunea dena txiki geratu zitzaigun. Espero dugu hurrengo elkargunea bertan egin ahal izatea”.
Bestalde, hizkuntzarengatik ere ez zela erraza izan adierazi dute: “Emakume migratzaile asko etorri ziren, eta ez genuen hizkuntza aldetik horrenbesteko aniztasuna espero. Apur bat kaosa egon zen une batzuetan ze momentu berean bost batzar zeuden. Hala ere, oso pozik egon ginen emakume migratzaileak ere herriko emakumeak direlako, eta aurrera begira lantzeko ere beharrizan batzuk irten zirelako, orain arte ez genituenak aurreikusten”.
Aurrera begira. Hurrengo ohiko elkargunea datorren urtean izango den arren, baliteke ekaina inguruan beste ezohiko elkargune bat egitea: “Aste honetan hasiko gara eguaztenetan irekitzen, eta funtzionamendua ondo doan edo ez ikusteko agian ekainean ezohiko batzar bat egingo dugu. Oraingoz, formakuntzak antolatzen hasiko gara, txandak egiten eta elkargunean irteten diren beste ekimen batzuk ere aurrera ateratzen”. Helburua espazioa bazkideen bitartez kudeatzea den arren, herritarrentzat zabalik daudela azaldu dute: “Andraetxera etortzeko gonbidapena egiten diegu herriko emakumeei, honen parte izan nahi dutenei”.
