Debabarrenan 200 tona hondakin gutxiago jaso dira 2023an
Debabarrenako mankomunitateak gaikako bilketaren beheranzko joera egon dela nabarmendu du. 2024rako erronkak datuak hobetzea eta hondakinen sailkapen egokia egitea dira.
Debabarrena Mankomunitateak beheranzko joera bat nabarmendu du 2023ko gaikako bilketaren datuetan, baina hondakin zehatz batzuen bilketan goranzko joera argia ikusi da. Hortaz, 2024rako erronkak datuak hobetzeaz gain, bilketa egoki bat egitea izango dira.
200 tona hondakin gutxiago jaso dira gaika Debabarrenan, “jaitsiera leun bat eman da aurreko urtetik hona”, eta azaldu dutenez jaitsiera nabarmenena beiran eman da; 2022an baino 130 tona gutxiago jaso dira. Horrez gain, plastiko gogorraren, txatarraren, gurpilen eta aparailu elektronikoen bilketa ere jaitsi egin da.
Datuak okerrera egin dute atal batzuetan, baina beste batzuetan, ostera, datuak hobetu egin dira: hondakin organikoek bilketan 100 tona gehiago bildu dira eta kafe kapsulen gaikako bilketa ia bikoitza izan da 2022ko datuekin alderatuta, (7.000 kg batu dira). Hondakin arriskutsuen bilketa ere %15 igo da.
Hortaz, datuak eskuan izanik, 2024rako erronkak finkatu dituzte eta eskualdeak hondakinen inguruan duen erronka nagusia da gaikako bilketaren tasa hobetzea, “hondakinak modu egokian sailkatzea dagozkien edukiontzietan”. Horretarako, Mankomunitateak “neurri irmoak” hartuko ditu; organikoaren edukiontziak itxiko ditu, arraindegietako hondakinen bilketa berezia martxan jarriko du, bilketa bereziak egingo dira komertzioetan eta ostalaritzan ordutegietara moldatuz, eta sortzen dituzten hondakinen araberako ordainketa sistema ezartzeko analisia eta inplementazioa egingo da industriaguneetan.
