Auzo, bazter nahiz kale, mozorro, jai eta kolore
Musika, gastronomia, folklorea eta, batez ere, kolorea izango dira protagonista, aratusteetan. Inauteri desfileak egingo dituzte nonahi, herritarrek mimoz prestatutako mozorroak plazaratuko dituzte.
Herritarrek iaz ere desfilean erakutsi zituzten euren mozorroak. Negu sasoiko egun grisak kolorez janzteko aldia ailegatu da. Lea-Artibai eta Mutriku herritarrak mozorroak prestatzen ibili ondoren, prest daude horiek jantzi eta kaleei nahiz auzoei kolorea emateko. Han eta hemen, kalejirak, txapelketak edota bestelako ekimenak egingo dituzte hainbat eta hainbat udalerritan. Jai giroa nagusi izango da, eta denetariko egitarauak edukiko dituzte eskuragarri.
[IKUSI EGITARAUA HERRIZ HERRI]
Lekeition, gogotik ospatzen dituzte inauteriak, egun asko eta askotariko ekintzekin. Bihar [otsailak 10], Lekitto Musika Bandako kideek beraien doinuekin girotuko dituzte jaiak, Nautika aurrean. Horrez gain, denetariko adinetako herritarrek mozorro lehiaketan parte hartzeko aukera izango dute, originalena zein izango. Markina-Xemeinen ere mozorrorik onenak lehiaketan sarituak izango dira, baina edukiko dute beste kuriositaterik ere: herriko dendek eta tabernek eurentzat propio diseinatutako txapelketa izango dute. Dendarik eta tabernarik onenarentzako sariak egongo dira. Aulestin, kuadrillen arteko txapelketa egingo dute; Torrezelaitik hasi eta herriko plazan amaituko duten kalejiran ikusi ahalko dira herritarren mozorroak. Bertan, batez ere goizean gozatuko dute herritarrek. Gizaburuagan, pintxo janagaz hasiko dute domeka; eguerdian, Irrikazu diskofestak girotuta, mozorroen pasarela egingo dute.
Hainbat zaporetako jaiak. Txokolate janaldiak eta, batez ere, tostadak izango dira inauterietako oturuntza mahaietan gehien agertuko diren jakiak. Izan ere, tostada lehiaketa herrikoiak egingo dituzte toki ugaritan, dentariko eragileek antolatuta. Etxebarrian, Luhartz erromeriaren zuzeneko musikagaz gorputza mugituko dute herritarrek bihar, eta jarraian indarrak berreskuratzeko elkartuko dira: txokolatea bizkotxoarekin dastatzeko aukera egongo da.
