Lotsak mozorrotuta atera dira herritarrak kalera
Eguraldi goibelari aurpegi ona jarrita, kolorez eta alaitasunez ari dira ospatzen herritarrak inauteri zapatua. Etxebarrian eta Aulestin, kalejiran eta bazkaritan elkartu dira kuadrillak eguerdian.
Bikote bat, Etxebarriko desfilean. Inauteri zapatua lotsa barik etorri da gaur [otsailak 10]. Denbora luzez prestatzen ibilitako mozorroak, azken momentuan pentsatutakoak, modan daudenak, modatik pasatzen ez direnak,… danetarikoekin atera dira ume, gazte zein nagusiak kaleak irudimenez janztera. Eguraldi goibelari aurpegi ona jarri diote herririk herri egin dituzten ekimenetan. Neguko egun grisari kolore bizia gehitu diote. Alaitasuna.
Tradizioari eutsita, kalejira egin dute etxebarritarrek beste urte batez eguerdi partean. Karro musikatuagaz girotu dute “Etxebarriko Gazte Asanbladak” ireki duen kalejira koloretsua. Bazkaritan batu arte luzatu dute desfilea. Urtero legez, ez dute giro onik falta izan. Bazkaritan, 90 lagun alkartu dira herriko frontoian.
Aulestin, Torrezelain batu dia 12:30ean, plazara kalejiran joateko. Plazara ailegatuta, kuadrillen ikuskizunak ikusteko aukera eduki dute herritarrek. Rapzeirrak, Lagunak eta Pamplona izan dira parte hartzaileak. Egin dituzten koreografiak txaloz eskertu dizkiete plazan bildutakoek. Sari banaketa ekitaldian batu dira ostean. Gazteen saria Rapzeirrakentzat izan da, nagusiena Pamplonarentzat eta azkenik, sari berezia, Estrella Galiciak jaso du. Bazkaritan batu dira ondoren.
[IKUSI HERRIZ HERRIKO EGITARAUA]
Ospakizunak nonahi. Berriatuan, Lekeition, Markina-Xemeinen, Munitibarren, Mutrikun eta Ondarroan ere egun handia da gaurkoa. Mozorro tailer, omenaldi, herri bazkari, kalejira, kontzertu, dantza, mozorro lehiaketa, erromeria… hori eta askoz gehiagogaz ospatuko dute inauteri zapatua. Domekan, astelehenean eta martitzenean ere egongo da zer ospaturik.
