Hamaika ekimen dakartza Mutrikuko Korrika Kulturalak
Domekan [otsailak 18] Bizkarsoro filmaren emanaldiarekin abiatuko da egitaraua. Aulestin ere eskainiko dute filma, egun berdinean.
Korrika Kulturaleko hitzorduak zehazten hasi dira Lea-Artibai eta Mutrikuko herrietan. Korrikaren etorrera girotu eta herriak kulturaz blaitzeko asmoz. Gaur gaurkoz, Aulestin eta Mutrikun zehaztu dituzte hitzorduak.
Mutrikuk egitarau bete-betea antolatu dute Korrikaren etorrera girotzen joateko; eskaintzarik ez da faltako herrian. Filmak, bertso ikuskizunak, erakusketak eta musika izango dira ardatz nagusiak. Euskararen aldeko aldarria ez da soilik egun batzuetara mugatzen Mutrikun eta, bakoitzak bere alea jarriz, herriko ikastetxeek, kirol zein kultur elkarteek eta udalak Korrika batzordearekin batera egitarau oparoa osatu dute. Domekan [otsailak 18] izango da lehenengo hitzordua: Bizkarsoro filmaren emanaldiarekin abiatuko baitituzte ekimenak, 18:00etan, Zabiel kultur etxean. Sarrerak eskuragarri daude udalaren webgunean.
Hain zuzen ere, Aulestiko Udalak Korrika batzordeagaz elkarlanean hitzordu berdina zehaztu dute; domekan, 18:00etan, Aulestiko Udal Areto Nagusian eskainiko dute Josu Martinez zinegilearen Bizkarsoro filma.
Mutrikun abiapuntua filma izango da, baina hamaika ekimen gehiago egongo dira aukeran. Anonyme Popular ikus-entzunezko bertso emanaldiak ere badu hitzordua eta sarrerak salgai daude. Ostean, erakusketaren txanda ailegatuko da; martxoaren 1etik 10era bitartean Korrika historikoaren erakusketa egongo da ikusgai Zabiel kultur etxean. “Aurreko Korrika guztien muralak, argazkiak eta informazioa jasotzeko aukera egongo da”. Martxoaren 15ean, Mutrikuko Rock Kolektiboak Gaztetxea baliatuz, musika jarriko du erdigunean, baina “oraindik ez daude zehaztuta taldeak”. Hilaren 17an, ostera, Euskaldunen jatorria, historia eta irria bakarrizketa eskainiko du Ion Martinez Esnaolak.
Korrikaren eguna hurbildu ahala, hankak martxan jarriko dituzte herrian eta martxoaren 19an Korrika Txikia antolatu dute herriko ikastetxeek. Martxoaren 20an egitarauaren unerik hunkigarrien ailegatuko baita; 14:00ak aldera ailegatuko da Korrika herrira. Egitaraua borobiltzeko, martxoaren 22an Zubixa Elkarteak zuzeneko musika emanaldia antolatu du.
Hortaz, hamaika ekimen daude aukeran, baina egitaraua ez da erabatekoa izango. “Ziur gaude agenda betetzen joango dela data hurbildu ahala”. Hortaz, Korrika batzordea eguaztenetan batzen dela gogorarazi nahi izan dute: 19:00etan, Kalaputxin.
EGITARAUA
Aulesti
- Otsailak 18 [domeka]. Bizkarsoro filma, 18:00etan, Udal areto nagusian.
Mutriku
- Otsailak 18 [domeka]. Bizkarsoro filma, 18:00etan, Zabielen.
- Otsailak 23 [barikua]. Anonyme Popular, 19:00etan, Zabielen.
- Martxoak 1-10. Korrika historikoa erakusketa, Zabielen.
- Martxoak 15 [barikua]. Mutrikuko Rock Kolektiboak antolatuta kontzertua, Gaztetxean. *Zehazteko.
- Martxoak 17 [domeka]. Euskaldunen jatorria, historia eta irria bakarrizketa, 18:00etan, Zabielen.
- Martxoak 19 [eguaztena]. Korrika txiki.
- Martxaak 20 [eguena]. Korrika
- Martxoak 22. Zubixa Elkarteak antolatuta zuzeneko musika saioa. *Zehazteko.
