Lea Artibai Ikastetxeko Ilusio Ponpak jardunaldia "energia positibo dosi handiekin" dator
Eguenean [otsailak 22] 09:30ean egingo dute Markina-Xemeingo Lea Artibai Ikastetxeko Auditorioan. Bertara joan nahi dutenek izena eman beharko dute.
Urteroko hitzorduari jarraituz badator Lea Artibai Ikastetxearen Ilusio Ponpak jardunaldia. Eskualdeko profesionalen gozamenerako, aurtengoa 10.a izango da; eguenean [otsailak 22] 09:30ean ikastetxeko auditorio berrian jarri dute hitzordua. Bertaratu nahi dutenek izena eman beharko dute 94-616 90 02 telefonora deituz edo www.leartik.eus web orrialdean; plazak mugatuak dira.
2012an jarri zuten martxan jardunaldia, jendeari arazoen aurrean ikuspegi baikorra transmititu eta motibazioa sustatzeko helburuagaz, eta ordutik hona hainbat hizlari ospetsuk parte hartu dute. Bakoitzak bere arloari helduz, baina, hizlari denek parte hartuko dute jardunaldian euren ikuspegi eraikitzailea eta baikorra zabaltzeko asmoagaz: “Ondorioz, jardunaldi honen arrakasta handitu egin da urtez urte”.
Aurtengoan ere ez da gutxiagorako izango, eta parte hartzaileak “energia positibo dosi handiak” banatzeko asmoarekin datoz. Hiru izango dira guztira bertan ariko diren hizlariak, denak ere “argiz betetako hizlariak”: Ibon Oregi, Mar Romera eta Emilio Duro.
Iaz Markina-Xemeingo Esperantza aretoan 100 pertsona baino gehiago batu ziren.
Oregi markina-xemeindarrak Aparretan bizi hitzaldiagaz erronkei nola aurre egin eta motibazioari buruz hitz egingo du: “Ikastetxeko soinketako irakaslea izandakoa da. Beti egon da kirolarekin lotuta, baina, entrenamendu batean zegoela istripu baten ondorioz hanka bat galdu zuen”. Antolatzaileek azaldu dute kostata, baina, kirolaren munduarekin lotuta jarraitzen duela: “Surfeko txapelketetan mundu mailan dabil, esaterako. Surf egokituko munduko txapeldunordea da”.
Romera, berriz, adimen emozionalean aditua da, eta baita Francesco Tonucci Elkarte Pedagogikoko presidentea ere: “Bere burua 67ko emakumea moduan aurkeztu zigun, esanez moduan ez dela atzo jaiotakoa eta ibilbide luzea duela gizonezkoen artean. Bera hezkuntzan ibili izan den arren, guri enpresen arlora bideratutako hitzaldia eskainiko digu”. Hori horrela, El valor de elegir es de valientes hitzaldia eskainiko du.
Azkenik, Ilusio Ponpaken lehenengo aldian parte hartu zuen hizlaria joango da bueltan, Duro, hain zuzen ere. Llevar una vida con sentido hitzaldia eskainiko du lan eremuan nahiz eremu pertsonalean aplikatzeko bizi jarrerak eta trebetasunak eskuratzeko aukerak emateko asmoz.
