Mutrikuko merkatu plazako postuak birkokatu dituzte
Barrenkalen kokatu dituzte merkatu plazako ohiko postu finkoak. Baserritarrak Txurruka plazan kokatuko dira obrak hasten direnean.
Mutrikuko Merkatu Plaza birgaitzeko lanak hasiko direla eta, bertoko postu finkoak herriko lokaletan egokitu dituzte asteon, zehazki, Iratxe lorak, Itxasne frutategia eta Perras arrandegia. Lanek lau hilabete inguru irautea aurreikusten dute udaletik, hortaz, ekainerako berriz ohiko lekuetan egotea espero da.
Barrenkale kalean birkokatuko dituzte aipatutako hiru postuak; Barrenkale 1 zenbakian Iratxe lorak eta Itxasne frutategia, eta Barrenkale 2 zenbakian, ostera, arrandegia.
Postu finkoez gain baserritarrei ere eragingo die obrek. Lanak hasi bitartean merkatu plazan egongo dira, behin lanak hasita, berriz, Txurruka Plazan eta udaletxeko arkupeetan egongo dira.
