Sei urte daramatzate borrokan Alamedako Pentsionistek
Gaur [otsailak 6] urteurren ospakizuna eduki dute Alamedan. Alkateak egindako bidea eskertu die.
Astelehen berezia da gaurkoa [otsailak 26] Ondarroako Alamedako pentsiodunentzat, sei urte bete baitira astelehenero antolatzen hasi zirenetik. Behar bezala ospatzeko batu dira, ohi legez, 12:00etan aldarria eta ospakizuna uztartu dituen ekimenean. “Seigarren urtea da hemen gaudena, gauza asko lortu ditugu eta beste gauza asko lortzeko daude, baina bidean gaude. Guk aurrera egingo dugu”.
Ekimenean ohiko elkarretaratzea egin dute, eta seigarren urteurreneko berritasun eta berezitasun legez, Urtza Alkorta Arrizabalaga alkateak aitortza eskaini die astero-astero borrokan ari direnei: “Eskerrik asko borroka honetan zabiltzatenoi, zuek zabiltzate baina denontzat ari zarete borrokan. Nahiz eta askotan zuen kontua dela ematen duen, ez, hau denon kontua da. Asteroko borroka honetan lorpenak ere egon dira, zoritxarrez, ez nahikoak, baina badoaz aurrera, pausoka gauzak lortzen. Bide luzea dago aurretik, batez ere, emakumeen egoera egonkortze aldera”. Egindako bideari eskerrak emanaz gain, udalaren izenean zoriondu egin ditu: “Zorionak egiten ari zareten lan guztiagatik, eta ea laster eskubide horiek geureganatzen ditugun eta denontzat izaten diren”.
Aldarri eta esker hitzen ostean, ekimena musikagaz eta mahai inguruko hamaiketakoagaz borobildu dute, eguraldia lagun eduki ez duten arren, ospakizunak ospatzeko baitaude. “Eskerrak eman nahi dizkiegu LAB sindikatuari eta udalari baliabideak jartzeagatik”.
