245 txirrindulari elkartu ditu Udaberrikopak Markina-Xemeinen
Domekan [martxoak 3] Bizkaiko txirrindularien eskolarteko Udaberrikopari hasiera eman zioten Markina-Xemeinen. Eguraldi txarra eginagatik, gogotsu aritu ziren txirrindulariak.
Argazkia: Markina-Xemeingo Txirrindulari Elkartea. Bizkaiko txirrindularien eskolarteko Udaberrikopa hartu zuen domekan [martxoak 3] Markina-Xemeinek. Udaberrikopari hasiera emateko 6 eta 12 urte bitarteko 245 txirrindulari elkartu ziren 10:30ean Lea Artibai Ikastetxearen inguruetan. Nagusienek 1,7 kilometroko ibilbideari zazpi itzuli eman zizkioten; gainontzekoek berriz, adinaren araberako itzuliak eman zituzten. Txikienek, ostera, bi itzuli eman zituzten ibilbide txikiago batean.
Hasieran euria egin zuen arren txirrindulari txikienek gogoz ekin zieten lasterketari. Atzetik, berriz, benjaminak irten ziren: “Benjaminetan bi maila elkartu genituen, eta horregatik tarte handiak ikusten ziren, bi urteko aldea asko delako. Hala ere, gainontzeko lasterketak urteka egin genituen, eta ondo joan ziren”. Benjaminen ostean, alebinak, eta jarraian infantilak irten ziren. David Rico santurtziarrak irabazi zuen infatilen lehenengo mailako lasterketa; Alain Villardon zornotzarrak infantilen bigarren mailako lasterketa, eta Noa Vegak nesken lasterketa: “Vega lasterketa guztian aurretik joan zen, eta oso-oso ondo aritu zen”.
“Neguko eguraldia” eduki zuten arren, amaierarako eguzkia ere irten zen, eta beraz, pozik geratu dira antolatzaileak: “Polita izan zen ikusteko. Barroeta inguruan jende asko egoten da ikusten, eta baita helmugan ere. Parte hartzearekin ere pozik geratu gara. Gogotsu etorri ziren denak, eguraldi txarra egon zen arren. Dena ondo joan zen, erorketaren bat tarteko, baina ezer larririk ez”.
Markina-Xemeingoaren ostean, beste sei lasterketa geratzen zaizkie txirrindulariei. Mendiko eta errepideko lasterketak tartekatzen dituzte, eta hurrengoa mendikoa izango da, martxoaren 17an, Durangon.
- Martxoak 17: Durango.
- Apirilak 17: Sondika.
- Apirilak 28: Igorre.
- Maiatzak 12: Berango.
- Ekainak 9: Karrantza.
- Maiatzak 23: Ermua.
