Emakume kirolariek hartu dute hitza Etxebarrian
Martxoaren 8ko ekintzak hasi dira eskualdeko hainbat herritan. Etxebarrian bideo emanaldia eta mahai ingurua egin dituzte.
Argazkia: Etxebarriko Udala. Pasaden asteburua ekintzaz betetako asteburua izan da Etxebarriko biztanleentzat. Izan ere, martxoaren 8a aitzakiatzat hartuz, bideo emanaldi bat eta mahai inguru bat egin dituzte. Bi ekintzen erantzunarekin pozik daude udaleko ordezkariak: “Bi ekintzak ondo joan ziren. Espero genuen jendea elkartu zen bertan”.
Barikuan [martxoak 1] eman zieten hasiera Etxebarriko zaintzak izeneko bideo baten emanaldiarekin: “Bideoan lau herritarrek parte hartu zuten, bakoitzak zaintza bere ikuspuntutik azalduz”. Bakoitzak, gainera, “oso desberdin” egin zuen berba: “Bakoitzak bere esperientzia azaldu zuen, eta ez zen errepikatu esan zuten ezer, denak gauza desberdinak azaldu zituzten”.
Bideo emanaldia egin zuten barikuan. Argazkia: Etxebarriko Udala.
Atzo [martxoak 3], berriz, Kirola eta Etxebarriko emakumeak mahai ingurua egin zuten. Leire Etxaniz, Eneritz Urzuriaga, Malen Alberdi, Jone Arroitajauregi, Haizea Agirre eta Sarai Larrinaga kirolariak elkartu zituzten kultur aretoan: “Hainbat kontu landu genituen: Noiz hasi ziren kirola egiten, zelan ikusten duten emakumea kirolean, komunikabideetan zer garrantzia ematen zaion…”. 17 urtetik 35 urte ingururainoko emakumeek parte hartu zuten, eta “oso ondo” joan zen: “Konturatzerako ordu eta erdi egon ginen. Prestatuta genituen galderak erantzuteaz gain, herritarrek ere euren ekarpenak eta galderak egin zituzten”.
Mahai inguruko hizlariak. Argazkia: Etxebarriko Udala.
