Emakume musikarien bizipenak ezagutu dituzte lekeitiarrek
Emakume musikarien egoeraren inguruan hausnartzeko 50 lagunetik gora elkartu dira Musikaia Musika Eskolaren 10. urteurreneko zazpigarren ekintzan.
Argazkia: Musikaia. Martxoaren 8a gertu dagoela aitzakiatzat hartuz, barikuan [martxoak 1] 50 lekeitiar inguru elkartu ziren emakume musikarien egoeraren inguruan hausnartzeko asmoz. Musikaia Musika Eskolaren 10. urteurrena ospatzeko zazpigarren ekintza izan zen barikukoa, eta herritarrek ezin hobeto erantzun zuten: “Oso mahai inguru polita izan da”.
Musika eskolako areto nagusian elkartu ziren herritarrak Naroa Ogando lekeitiarraren gidaritzapean Irati Bilbao (jazz kantua), Maddi Txurruka (tronpetista), Ane Legarreta (orkestra zuzendaria) eta Nerea Quincoces (perkusionista) musikarien esperientziak entzuteko: “Gonbidatuak oso eroso sentitu dira eta bakoitzaren pertsonalitate zein espezializazio ezberdinekin oreka zoragarria lortu dugu”.
Gonbidatuak eta Naroa Ogando dinamizatzailea. Argazkia: Musikaia.
Iturrioz BHI, Lekeitioko Azkue Natura Ikastola eta Musikaiako ikasleek galderak egin zizkieten gonbidatuei, eta hausnarketa sakona egiteko balio izan zuten: “Mahai inguru dinamikoa izan da. Emakumeek gaur egun musika ikasketa zein ogibideetan duten egoeraz pentsatu dugu, eta gonbidatuen bizipenak entzun ditugu. Guztiak interesgarriak, eta bizipenen batzuk gogorrak ere bai, jasan izan dituzten diskriminazio egoera batzuen ondorioz (kontserbatorioan, eszenatoki gainean, lan baldintza ezberdintasunak…)”.
Antolatzaileak pozik geratu zazpigarren ekintzagaz ere: “Oso eskertuta gaude parte hartu duten ikastetxe, dinamizatzaile eta herritarrei, eta noski gonbidatuei ere eskerrik beroenak eman nahi dizkiegu. Ikusleek erantzun oso ona eman dute”. Zortzigarren ekintza apirilaren 27an egingo dutela aurreratu dute, eta “ikasturteko ekintzarik garrantzitsuena” izango dela.
