Etxeko taldeak maila ederra erakutsi du 32. Ondarru Sarian
Ia adin tarte guztietako podiumean izan dute ordezkaritza. Pozik agertu da taldea probak izandako erantzunagaz.
Argazkia: OIT Ondarroa Igeri Taldeak antolatuta, zapatuan [martxoak 2] 32. Ondarru Saria lehiatu zuten Zaldupe udal kiroldegiko igerilekuan. Igerilari federatu eta eskolarren artean ia 220 igerilari batu zituen probak, zehazki, Amorebieta-Etxano, Atxondo I.T., Kikunbera I.T., Igorre Igeriketa Taldea, C.N. Izarraitz eta C. N. Zurkide Zalla taldeetakoak. “Oso ondo joan da proba eta emaitzetan ikusi da”, adierazi du Ioar Urkiri Ondarroako entrenatzaileak.
Aurten, talde bat gehiagoren partaidetza izan du probak, hortaz, zailtasun maila handiagoa zen. Hala ere, herriko taldeko igerilariek maila ederra erakutsi eta emaitza ikusgarriak lortu dituzte. “Bi proba egin zituen igerilari bakoitzak eta bi proba horien puntuazioaren baturaren arabera egin da sailkapena”.
Argazkia: OIT
09:00etan hasi ziren taldeko nagusienen probak, eta adinaren araberako sailkapenak egin dituzte, federatuen kasuan, 2004tik 2011ra bitartean jaiotakoen sailkapena egin dute, eta ia podium denetan egon da Ondarroako igerilarien ordezkaritza. 12:30ak aldera, ostera, eskola kiroleko igerilarien txanda izan zen (2012-2015 urteetan jaiotakoak), eta hemen ere maila izugarria erakutsi dute etxekoek; dominak nonahi izanik.
Urkiri pozik agertu da taldeko igerilariek erakutsitako mailagaz: “Igerilariak ondo lehiatu dute eta oso ondo joan da, pozik gaude”. Arratsaldean, ostera, igeri eskolakoen erakustaldiaren txanda ailegatu zen.
Ondarru Igeri Taldetik pozik agertu dira sariak edukitako erantzunagaz: “Ondarru Sariak parte-hartzaileen herrien arteko harremanak sendotzen jarraitzen du. Lehiaketatik haratago, ospakizun honek kirolaren balioak azpimarratzen ditu eta igerilarien arteko lankidetza eta gainditze espiritua sustatzen du”. Ohitura den bezala, gauean, taldeko igerilari eta gurasoak mahai inguruan batu ziren, “igerilekuko egun gogor baten ondoren une bereziak partekatzeko”.
