Langile borrokari omenaldia,1976ko Gasteizko sarraskiaren urteurrenean
Martxoaren 16an 'Gasteizko sarraskia' hitzaldia eskainiko du Julen Diaz de Argotek Alai tabernan.
48 urte bete ziren atzo [martxoak 3] langileen eskubideen defentsan borrokan zeuden bost langile erail zituztela Gasteizen, 1976an. Ohi legez, elkarretaratzea eta lore eskaintzagaz osatu zuten LAB sindikatuak eta Ernai Gazte Antolakundeak antolatutako omenaldian. “Gasteizen egindako sarraskia gogoratzen jarraitzen dugu. Hainbat hilabetez soldata duinak eskatzen aritu ondoren, langile klasearen mobilizazioei jarraipena ematen zien greba orokorraren testuinguru hartan, bost langile erail eta 150 zauritu zituzten”.
Argazkia: LAB
Oroimenak bizirik jarraitzen duela aldarrikatuz, langile mugimenduaren ikur bilakatu da eguna: “Oroimenak bixi-bixi jarraitzen du Euskal Herrian. Belaunaldiz belaunaldi jendarte eta justiziaren, antifaxismoaren, eta klase borrokaren balioak trasmitituz. Gure aitortza eta gogoa Pedro Maria Martinez Ocio, Francisco Aznar, Romualdo Barroso, Jose Castillo eta Bienvenido Peredari, eta baita Gasteizko sarraskia salatzen zuten elkartasun manifestazioen aurkako errepresioaren ondorioz ondoren hil zirenei ere”.
LAB sindikatuaren 50. urteurrenaren baitan “langile borrokari eta belaunaldiz belaunaldi egin diren borroka nekaezinei” egin diote aipamena: “Irabazteko bide bakarra langile, gazte, ikasle, emakume, pentsiodun eta herri sektore guztien arteko batasuna da. Aktiboki antolatuz, borrokak bateratuz, ezberdintasunak alboratuz eta kontzientzia goratuz. Ezin baita erosi langileen odola eurotan!”.
Martxoak 16
- 12:00. Gasteizko sarraskia hitzaldia, Martxoak 3 elkarteko Julen Diaz de Argoteren eskutik, Alai tabernan.
