Lekeitioko Udako Arte Erakusketan apirilaren 13ra arte eman daiteke izena
Uztailaren 9tik abuztuaren 18ra bitartean egingo dute erakusketa, Eskolape Aretoan.
Badator beste behin ere Lekeitioko Udako Arte Erakusketa. Aurtengoan uztailaren 9tik abuztuaren 18ra bitartean egingo dute erakusketa, Eskolape Aretoan; parte hartu nahi duten artistek apirilaren 13ra arte edukiko dute haien proposamenak aurkezteko aukera. Lekeitioko Udalak azaldu du erakusketaren bitartez alor desberdineko artistengana heldu nahi dutela, arte aniztasunaren isla izan dadin.
Erakusketan parte hartu nahi dutenentzako bi modu zabaldu dituzte: Lekeitioko Kultur Etxera joanda edo kulturetxea@lekeitio.eus helbidera idatziz. Artista bakoitzak bere lanen argazkiak eta dokumentazioa (biografia eta erakusketaren azalpenak) aurkeztu beharko ditu. Aurezktu ostean udaleko kultur sailak ebaluatuko ditu aurkeztutako lanak; Lekeitioko eta eskualdeko artistek lehentasuna edukiko dute.
Lanak ebaluatu ostean, maiatzaren hasieran onartuen eta baztertuen zerrenda argitaratuko dute, eta ondoren zozketa baten bitartez hautatuko dira behin betiko parte hartzaileak. Erakusketan parte hartuko duten artisten %70 lekeitiarrak izango dira (lekeitiar moduan onartzeko izena ematearekin batera errolda agiria aurkeztu beharko da), %10 mankomunitatekoak eta %20 kanpotarrak.
Parte hartzaileen zozketaz gain, erakusketa ipiniko duten astea ere zozketatu egingo dute, jatorriaren araberako lehentasunagaz. Udalak jakinarazi du ezin dela erakusketarako astea aldatu; artista bik euren artean trukatu nahi badituzte, ados jarri beharko dira.
Horrez gain, printzipioz astebeteko erakusketak izango diren arren, erakusketen iraunaldia aurkeztutako artista kopuruaren araberakoa izango da; bi astetara luzatu daiteke aurkeztutako partaide kopuruaren arabera. Gutxieneko hautagai kopurua bateko ez balitz, iazkoek ere parte hartzeko aukera edukiko dute, baina osterantzean, artista batek bi urtetik behin baino ezingo du parte hartu. Kasua hori balitz, udala jarriko da eurekin kontaktuan zozketa egin aurretik. Informazio gehiago eta oinarriak www.lekeitio.eus web orrian jarri dituzte eskuragarri.
