65 lagun elkartu dira Etxebarriko bertso afarian
Sustrai Colina, Josune Aramendi eta Miren Amuriza bertsolariek girotu zuten afaria. Antolatzaileak "oso pozik" geratu dira afariak izan duen erantzunagaz.
Argazkia: Etxebarriko Gazte Asanblada. Goi mailako bertsolariekin afaldu zuten zapatuan [martxoak 16] etxebarritarrek. Hain zuzen ere, Sustrai Colina, Josune Aramendi eta Miren Amurizagaz bertso afaria antolatu zuen Etxebarriko Gazte Asanbladak. Antolatzaileak pozik daude bertso afariak izandako erantzunagaz: “65 tiket saldu ziren, denak oso arin. Oso ondo joan zen saioa, eta egunean bertan sarrera gehiago eskatu zizkiguten arren, ez zen geratzen. Jendea gustura egon zen, denak oso pozik”. Gainera, herritarrak ez ezik, inguruko herrietakoak ere joan ziren afarira.
Mota guztietako gaiak jarri zituzten mahai gainean, eta ezin hobeto erantzun zuten bertsolariek: “Goi mailako bertsolariak dira, eta eurek duten kalitateagaz bakarrik edozein gairi buelta emateko gai dira, eta hori igartzen da. Oso ondo joan zen, eta euren arteko konplizitateak lagundu egin zuen elkarri erantzuteko, publikoarekin jolasteko… Gai gehienak umorezkoak ziren arren, bakarkako gai serioago batzuk ere sartu genituen”.
