Dena prest Baionan, 23. Korrikaren amaierarako
Argazkia: AEK. 2.700 kilometroko ibilbidearen ondoren, eta Lapurdiko hiriburu osoa zeharkatuta, Santizpirita zubitik sartuko da 23. Korrika domeka honetan [martxoak 23], 12:30ak aldera, Askatasun plazara, eta, bertan, irakurriko dute 11 egunez eskuz esku garraiatutako mezua: «Une horretan jakingo dugu nor den lekukoaren barruko mezu sekretuaren egilea, eta, noski, baita mezuaren beraren edukia ere».
Euskal Herriko hainbat eragilek osatuko dituzte azken kilometroak: Gure Esku, Etxerat, Sare eta Bakebidea, Errigora eta Agerraldia, alderdi politikoak, sindikatuak, UEMA eta Udalbiltza, Hekimen, hezkuntza eragileak, Azterketak euskaraz kolektiboa, Kontseilua eta Euskal Konfederazioa eta AEK. Eta, jarraian, Pantxika Maitia Kanaldude telebista-kateko kideak aurkeztuko du ekitaldia.
AEKko arduradunen arabera, «hitzordu ederra izango da Baionako herritarrentzat nahiz eragileentzat, euskararen aldeko lanean segitzeko akuilua».
Jai «handia» prestatu dute auzolanean, «Korrikak merezi duen modukoa», eta egitarauan Iparraldeko kultur eragileen parte hartzea lehenetsi dutela azaldu du Ibai Capot Thornary jaiaren arduradunak. Era berean, Jean Rene Etchegaray Baionako alkateak nabarmendu du «hiri osoa aritu dela buru-belarri Korrikaren alde», eta bera buru den Euskal Hirigune Elkargoak Euskararen Erakunde Publikoari emango dion diru ekarpena, Baiona euskara plana eta azterketak euskaraz egiteko aldarrikapenari erakutsi izan dion babesa hizpide izan zituen Korrikaren amaierako jaia aurkezteko agerraldian.
Protokoloa. Bestalde, martxoaren 24a eraso sexista, arrazista eta homofoborik gabeko eguna izan dadin, AEKk berariazko protokoloa ezarri du. Prebentzio lana egiteaz gain, eraso bakoitzari erantzutea ahalbidetuko duela esan dute.
Egitaraua:
SAN ANDRES PLAZA
- 13:45. Anje Duhalde.
- 16:00. Xutik.
- 18:15. Xiberoots.
- 20:30. Sfm.
MERKATU GUNEA
- Mundu bat Korrika! erakusketa eta horma-irudia.
- 13:30. Zikiroa.
- 16:00. Pontx pailazoa.
PATXA PLAZA
- 14:00. Haira.
- 15:30. Zetkin.
- 17:30. Toc.
- 19:15. Nakar.
- 21:00. Kuma No Motor.
- 22:45. Akts.
KALEETAN
- 10:30. Patxi ta konpania, Gambetta plazan.
- 11:00. Kuxkuxtu, Merkatu plazan.
- 13:30. Topatopia batukada, Patxa plazan.
- 14:00. Ixtaklok, Bar Basquen.
- 18:00. Patxaranga Zamain.
