Markina-Xemeinen amaituko da 21. Laburbira euskarazko film laburren zirkuitu ibiltaria
Barikuan [apirilak 12] hasiko da Armintzan eta Euskal Herriko 35 herritan emango dituzte emanaldiak. Maiatzaren 12an helduko da Esperantza aretora.
21. Laburbira euskaraz sortu eta ekoitzitako film laburren zirkuituko lan aukeratuak apirilaren 12tik maiatzaren 12ra arte ikusi ahalko dira. Aurrestreinaldia apirilaren 11n egingo dute Durangoko Zugaza zinema aretoan. Gero, Armintzan eta Bergaran emango dituzte lehen emanaldiak. Hain zuzen ere, azken saioa Markina-Xemeinen egingo dute, Lea-Artibai eskualdean egingo duten geraleku bakarra izango da. Udalak antolatuta, maiatzaren 12an 19:00etan emango dute emanaldia, Esperantza aretoan.
Guztira 37 emanaldi egingo dituzte Euskal Herri osoko 35 herritan. Horrez gain, sortzaile eta ikusleen arteko harremana “erraztu eta sendotzeko”, zuzendariekin solasaldiak egingo dituzte horietako askotan. Horrela, zuzendariek filmen inguruko azalpenak emateko eta herritarren galderak erantzuteko aukera izango dute. Hemen dago Laburbirak herriz herri egingo duen ibilbidearen datak eta antolatzaileak.
Hain zuzen ere, aurten 22 lan aurkeztu dira eta zortzi izan dira hautatuak eta horrenbestez proiektatuko dituztenak:
- Dena asmatuta dago (Jone Arriola)
- Katalinaren zoria (Guillermo Ordas)
- Erro (Amaia Lejarreta)
- Babesa (Ander Iruretagoyena)
- Mundu berri bat (Mikel Alvarez)
- Zirrara (Ane Cuesta)
- Talkak (Ilune Diaz eta Jordi Nuet)
- Betizu buru (Ander Iriarte)
Euskaltzaleen Topagunetik esan dute “denetariko lanak” aurkeztu direla, edukiz zein estiloz, eta asko dagoeneko zinema jaialdietan sarituak izan direla. “Orotara, 87 minututako film-labur sorta ikusgarria osatu da ikusleei ahalik eta emanaldi aberasgarriena eskaini asmoz”.
Gogoratu dute Laburbirak bi helburu nagusi dituela: “Batetik, euskal zinemagintza hauspotzea, zinemagileoi zuen lanak erakusteko aukera emanaz; bestetik, herritarrei euskaraz sortutako film laburrak ezagutaraztea”. Alde horretatik, azken 20 urteetako ibilbide “arrakastatsua” goraipatu dute. Laburbira zinemagintzaren “erakusleiho erreferentziala” bihurtu da: “Zirkuitu egonkor eta zabal bat eskaintzen duen neurrian, industria osoaren pizgarri moduan ere eragiten du”.
