Barikuan hasiko da VII. Loratu Mutriku bonu kanpaina
Goizez zein arratsaldez eskuratu daitezke bonuak Turismo bulegoan. Bi asteko epealdia izango du kanpainak: maiatzaren 5a izango da azkenengo eguna.
Mutrikuko merkataritza, ostalaritza eta zerbitzuetako aktibitatea indartzea eta herriko familien ekonomian laguntzeko asmoz sortu eta jada herrian errotuta dagoen zazpigarren Loratu Mutriku bonu kanpaina martxan hasiko da barikuan [apirilak 19] eta maiatzaren 5era bitartean egongo da abian.
2020ko udazkenean egin zen lehenengo bonu kanpaina eta herriko hainbat sektoreen jardunean “eragin baikorra” izateaz gain, herritarrengan ere oihartzun zabala izan zuen; “Askok eskertu zuten ekimena aurrera eraman izana”. Hori dela eta, zazpigarrenez ipini dute abian; udaberriko kanpaina izango da oraingoa eta udazkenean ere egingo dutela aurreratu dute.
Kanpainarekin herriko merkatari eta ostalarien artean 60.000 euro mugitzea eta udalerriko familien erosteko ahalmena 18.000 eurorekin diruz laguntzea lortu nahi du Mutrikuko Udalak, zehazki, 1.200 bonu finantzatuko ditu 20.000 euro erabilita.
Bonuen funtzionamendua ohikoa izango da; bonu sorta bakoitzak 50 euroko balioa izango du eta banatuta egongo da, 10 euroko hiru bonu eta 5 euroko lau bonu edukiko dituelarik. Bonuak 50 euroko balioa izango du, baina herritarrak 35 euro ordainduko ditu, gainontzeko 15 euroak udalak ordainduko dituelarik. “Erosketa tiketaren zenbatekoa bonuaren kopuru bera edota handiagoa izan beharko da, hau da, bonuekin ordainduta ez da itzulketarik egingo esku dirutan ezta bonu txikiagotan ere. Erosketaren balioa bonuaren kopurua baino handiagoa denean, falta dena diruz ordaindu beharko da”.
Bonuak erosi ahal izateko nahitaezkoa da Mutrikun erroldatuta egotea eta sei urtetik gora izatea. “Norbaiti bertaratzea ezinezkoa bazaio, lagun edo familiako kideren batek eros dezake bere bonua nortasun agiriaren kopia bat erakutsita. Erosketa bakoitzean, gehienez ere 2 bonu erosi ahal izango dira batera”. Bonuak kanpainara atxikitutako 37 establezimenduetan erabili ahal izango dira eta behin bonuak erosita ezingo dira itzuli, ezta dirutan trukatu ere.
Bonuak Turismo Bulegoan egongo dira eskuragarri apirilaren 19tik aurrera; domeatik eguenera 10:00etatik 14:00etara, eta bariku zein zapatuetan, ostera, 10:00etatik 14:00etara eta 16:00etatik 18:00etara.
Honakoak dira kanpainara atxikitutako establezimenduak: Alazne Optika, Albaro denda, Alboka okindegi eta kafetegia, Aldana Burdindegia, Alday Klinika, Ametza Taberna, Ansorregi Oinetakoak, Apain Estetika Zentroa, Aparra arropa denda, Apartak ileapaindegia, Arrizabalaga harategia, Bare Bare taberna, Bigara fruta denda, Buceo Euskadi, Dilaitz barne diseinua, Dotore ileapaindegia, Ekoamalur ekodenda, Garaia arropa denda, Gotzon arrandegia, Iratxe lorak, Iratxe masajeak, Iripe etxetresnak, Islada fisioterapia, Itxasne frutategia, Joseba Elezgarai masaje eta osteopatia, Josune ileapaindegia, Kalbaixo jatetxea, Lasuen Elezgarai botika, Lekube burdindegia, Lon Apraiz botika, Madariaga paperdenda, Maider Pinto estetika, Maneiro lentzeria, Olaizola arropa denda, Potero denda, Sabina denda eta Tximak ileapaindegia.
