Berriatuko 25. BTT martxa egingo dute zapatuan
Izena eman nahi dutenek 08:30ean egon beharko dute herriko plazan; izen emateak 10 euro balio du.
Urepel Kirol Taldeak, udalaren laguntzagaz, 25. aldiz ospatuko du zapatuan [maiatzak 18] Berriatuko mendi bizikleta martxa. Parte hartzaileak 09:00etan aterako dira, baina izena emateko, 08:30ean egon beharko dute herriko plazan; izen emateak 10 euro balio du. Antolatzaileek bi ibilbide antolatu dituzte. Luzeak 34 kilometro eta 1.300 metroko desnibel positiboa edukiko ditu. Eta laburrak 22 kilometro eta 800 metroko desnibel positiboa. Biak ala biak iazkoak baino luzeagoak dira.
Ohi bezala, txirrindulariek helmugan ez dute jatekorik edota edatekorik faltan izango. Horrez gain, dutxatzeko aukera ere izango da. Bestalde, zozketak ere egingo dizute: tokiko produktuz osaturiko otzarak eta Spiuk txirrindularitzarako markaren produktu sorta zozkatuko dituzte. Ibilbideak markatuta egongo diren arren, txirrindulari bakoitzak egingo duen ibilbidearen track-a deskargatuta eroateko gomendioa egin dute antolatzaileek; track-ak Wikiloc plataforman daude eskuragarri.
