Ondarroako Udalak batzarra eskatu dio Osasun Sailburuari
Ondarroako Osasun Zentroko langileek atzo [maiatzak 16] egin zuten lehenenego elkarretaratzea eta egunero aterako direla jakinarazi dute. Gaur [maiatzak 17] alkateak eta alkateordeak parte hartu dute elkarretaratzean.
Argazkia: Udalbarriak Ondarroako Osasun Zentroko langileek lehenengo elkarretaratzea egin zuten atzo [maiatzak 16] egoera jasanezina salatzeko eta, egun berean, Urtza Alkorta Arrizabalaga Ondarroako alkateak batzarra eskatu zion Gotzone Sagardui Eusko Jaurlaritzako Osasun sailburuari egoeraren berri eman eta konponbidea bilatzen ahalegintzeko asmoz.
Atzo egin zuten lehenengo elkarretaratzea eta egunero kalera aterako direla adierazi dute, zehazki, 10:00etan batuko dira, atarian, 10 minutuz. Gaur [maiatzak 17] elkarretaratzeen bigarren egunean alkateak eta Irina Alkorta Bedialauneta alkateordeak parte hartu dute, udalaren inplikazioa erakutsi eta babesa eskaintzeko asmoz. “Gure babesa emateaz gain, gai honetan udala ere inplikatuta dagoela eta egoera hobetzen laguntzeko gure konpromisoa erakustera joan gara. Batzar bat eskatu diot Gotzone Sagardui sailburuari, egoera oso larria eta jasanezina delako. Konponbidea bilatu behar da”, azaldu du Alkortak.
Udalak egoera “kezkaz” bizi duela jakinarazi duela zehaztu du, herritarrek jasotzen duten zerbitzua “ez da behar modukoa” eta herritarren kexak geroz eta gehiago direla. Horrez gain, Osasun Zentroko langileen egoera erdigunean ipin nahi izan dute: ” Osasun Zentroko profesionalen egoerak ere kezkatzen du udala, lan baldintzak ez baitira osasungintzako profesionalek izan behar dituztenak herritarrak behar moduan artatzeko. Horren erakusle, langileek beraiek egin duten salaketa Osasun Zentroan”.
Egoeraren aurrean langileak, herritarrak eta udala eskutik joatearen garrantzia azpimarratu du Alkortak: “Udala, langileak eta herritarrak eskutik joango gara Osakidetzari eta osasun sailari Ondarroan behar moduko zerbitzua eskaintzea eskatzeko. Zerbitzuaren kalitatea bermatu ahal izateko beharrezkoa da bai zerbitzua hobetzea eta bai profesionalen beharrizanak betetzea, lotuta doaz”.
