Lea.Tronik erakusketa interaktiboa Ispasterrera helduko da
Domeka goizean [maiatzak 26] Iñigo Egiluz aretoan kokatuko dute. Izena eman beharra dago.
Lekeitioko Arropaineko Arragua elkarteak egun batez bere espazioa Ispasterren kokatuko du. Hain zuzen ere, bi esparruren arteko elkargunean kokatzen den espazioan bideratzen ditu bere ekintzak: sorkuntza praktikena eta ezagutza transmisioarena. Domekan [maiatzak 26] Iñigo Egiluz aretoan sorkuntza garaikidearen praktikak garatzeko gunea sortuko dute. Alter-Effect espazioan Lea.Tronik proiektuaren tailerretan ekoiztutako ekintza, tramankulu, jolas eta asmakizunekin jolastu eta esperimentatu ahal dute herritarrek.
Parte hartu nahi dutenek izena eman behar dute. Herritar guztiei, batez ere familiei, zuzenduta dagoen espazioa da. Hori bai, gutxieneko adina 6 urtekoa da eta 10 urtera arteko haurrak heldu batez lagunduta parte hartu behar duela esan dute. Ordubeteko saioak egingo dituzte 11:00etan eta 12:00etan. Izena eman nahi dutenek inprimakia bete behar dute.
Erakusketa interaktibo bat da azken batean.Arropaineko Arraguak proposamen harremanen esparru “erabat demokratiko” bat eman nahi du. Hau da, esparru ba dat, erakundeen, sortzaileen, biztanleria orokorraren eta prestatzen ari direnen arteko “sinergia” sustatuko duena, “lurraldeko sorkuntza-ekoizpenekiko jarrera garaikidea lortzeko eta sortzaileak eta haien ekoizpenak indartzeko”. Arraguak proposatzen du “posible” dela kultur merkantziatik eta haren kontsumotik pasatzen ez diren “beste harreman batzuk” pentsatzea, “ahal den neurrian harreman esperimentalak irekiz eta artearen lana praktika sozial gisa identifikatzeko prozesua indartuz, besteak beste”.
