Palestinaren inguruko hitzaldia antolatu dute Lekeition
Lekeitioko zein eskualdeko herritarrei dei egin diete barikuko [maiatzak 24] Kultur Etxeko Azkue aretoko hitzaldira bertaratzen.
Zazpi hilabete bete dira urriaren 7an Palestina eta Israelen arteko guda hasi zenetik, eta ordutik Lekeition hamaika ekintza antolatu dituzte. Barikuan [maiatzak 24] 18:30ean Palestinako egoera, erasoaldi inperialista eta herrien erresistentzia hitzaldia antolatu dute, Kultur Etxeko Azkue aretoan. Bertan, Samidoun Euskadiko palestinar presoen elkartasun sareko eta Askapena antolakunde internazionalistako kide banak parte hartuko dute.
Lekeitiok bat egin du Euskal Herrian Palestinagaz Elkartasuna Plataformak deitu dituen mobilizazioekin. Antolatzaileek uste dute “garrantzitsua” dela momentuko egoeraren klabe nagusiak “ondo kokatzea, gurean ere nola jokatu behar dugun pentsatzeko”. Horrez gain, azaldu dutenez, haienak egin dituzte oinarrizko printzipioak: “Palestina osoaren askapena; Israelen desagerpena; okupazioa posible egiten duten erakunde zein enpreseei boikota; eta palestinar erresistentziari babesa”.
Oraingoan, berriz, Palestinako egoeratik abiatuta baina fokoa gehiago zabaltzeko intentzioa dute. Izan ere, jakin badakitelako Palestinaren aurkako erasoak mundu mailako egoeragaz “harreman zuzenak” dituela. Palestinako egoeraz gain, Palestina kokatua dagoen eskualdeko egoeraz mintzatuko dira. “Baita Estatu Batuak buru dituen inperialismo kapitalistaren krisi egoeraz; NATOren funtzioaz eta gerraz; Europaren posizioaz eta faxismoaren gorakadaz; Txina eta Errusiak lideratzen duten blokearen inguruan; edota erasoaldi inperialistaren aurrean mundu mailan agertzen joan diren erresistentzia borroken esperientziez, hala nola Donbassen, Afrikako Sahelen edota Hego Ameriketan”.
