Goitisolo eta Urrutia nagusitu dira Mutrikuko X. Sprint Triatloian
208 kirolarik amaitu zuten proba. Lea-Artibai eta Mutrikuko taldeen ordezkaritza bermatuta egon da proban.
Peñota Dental Alusimga taldeko Joanes Goitisolo Otazula gernika-lumotarra eta Saltoki Trikideak taldeko Eneritz Urrutia Tena nagusitu ziren zapatuan [maiatzak 25] Mutrikuko X. Sprint Tritaloian. Goitisolok 01:02:35ko denboran osatu zuen proba, iazko bere denbora dezente hobetuz (1:04:54ko denbora osatu zuen). Emakumezkoen artean, Urrutia nagusitu zen 01:15:36ko denbora sinatuz.
Gizonezkoen kategorian Lekeitioko Garraitz Kirol Taldeko Aratz Aizpurua Gordillo (01:03:45) izan zen bigarrena helmugaratzen eta Peñota Dental Alusigma taldeko Ander Garcia Rendok osatu zuen gizonezkoen podiuma (01:03:51). Emakumezkoen artean, Hiruki taldeko Nuria Rodriguez Sanchez izan zen bigarrena helmugaratzen (01:16:54) eta Yepa! Triatloi Klubeko Aitana Abalos Campoyk osatu zuen podiuma (01:17:39). Sailkapeneko bosgarren postua bereganatu zuen Ioana Osa Larruzea ondarrutarrak 01:19:49ko denboragaz eta eskualdeko taldeen ordezkaritza ere egon zen emakumezkoen artean, esaterako, Ondarroako Koaxi Triatloi Taldeko Larraitz Torrontegi hamazazpigarren helmugaratu zen.
208 kirolarik abiatu zuten proba Mutrikuko igerilekutik eta taldekako sailkapenean bigarren postua eskuratu zuen Lekeitioko Garraitz Kirol Taldeak. Aipatutako taldeaz gain, inguruko taldeen ordezkaritza bermatuta egon zen Lekeitioko Amandarri Triatloi Klubeko kirolariak, Talaixa Triatloi Kluba eta Alarabi Lea-Artibai Markina taldekoak ere egon ziren.
Kategoriatako sailkapenetan ordezkaritza nabarmena izan zuen Garraitz Kirol Taldeak. Junior mailan, ostera, Julen Ugalde Zabaleta eta Aner Larreategi Erkiaga nagusitu ziren, kategoria banatan. Kadete mailako gizonezkoen kategorian Aner Zumaran Uskola nagusitu zen, hain zuzen ere, sailkapen orokorreko bederatzigarren postua ere lortuta. Emakumezko kadeteen artean, ostera, Nikole Markuerkiaga Sarria taldekidea izan zen bigarrena. 23 urte azpiko gizonezkoen kategorian, berriz, Urdaitri Triatloi Taldeko Unai Zoilo Elexgaray nagusitu zen.
