Etxean aurkeztuko du bere bigarren lana Shibari taldeak
Sei abestiz osatutako 'Bizi mihisean nahi gabe tatuatuak' diskoa aurkeztuko du Shibari talde ondarrutarrak bihar [ekainak 7], Portuko Ranpako kontzertu zikloari amaiera emateko, Lepora taldeagaz batera.
Argazkia: Begipuntuan. Urtero antolatzen dute Portuko Ranpako kideek #sareartin Kontzertuk deituriko egitasmoa, irailaren amaieran hasi eta ekainaren hasierara arte. Bihar [ekainak 7] emango diote bukaera Shibari talde ondarrutarraren bigarren lanaren aurkezpenagaz eta Lepora taldearen kontzertuagaz, 22:30ean emango diote hasiera gauari.
Etxera bueltan dator Shibari taldea eta “pozik” daude Bizi mihisean nahi gabe tatuatuak lana beraien habia den Portuko Ranpan aurkeztuko dutelako. 2023ko apirilean grabatu zuten diskoa, Abadiñoko Amaraun Arte Fabrikak antolatu zuen maketa lehiaketa irabazi zutenean, diskoa grabatzea izan baitzen saria. Urte beteko atsedena hartu ostean, bueltan datoz, sei abestiz osatutako lana aurkeztera. Kontzertuko sarreragaz batera disko berria oparituko du taldeak, kontzertura datozenei eskertzeko modua dela azpimarratu dute.
Lepora laukote gasteiztarra ere oholtzan egongo da. Musika munduan hainbat proiektu desberdinetan ibili da taldeko musikari bakoitza. 2020an argitaratu zuten lehen diskoa eta 2022ko azaroan bigarrena grabatu zuten eta hauek ere, taldearen bigarren diskoa aurkeztera datoz Portuko Ranpara.
Ikasturtearen balorazio “oso ona” egin dute #sareartin Kontzertuk egitasmoaren antolatzaileek. “Oso balorazio positiboa egin dugu, pila bat jende igaro da Portuko Ranpatik aurten eta dena ondo atera da. Datorren ikasturtean jarri beharko dugu begirada laster, musika talde askok nahi dute Portuko Ranpan kontzerturen bat eskaini eta alde horretatik ez daukagu kexarik”.
