Oletako jaietako hiru egunak "ahal den osoen" beteta datoz

Zapatutik [ekainak 8] astelehenera [ekainak 10] ospatuko dituzte Oletako jaiak. Zapatuan eta astelehenean Lekeitiotik autobus zerbitzua egongo da, eta zapatuan, baita Gababusa ere.

Garaia Pagola Urriza

Amoroto

2024/06/06

Gero eta gertuago daude eskualdeko herrietako ia jai gehienak; Oleta izango da udako denboraldiari hasiera emango dion horietako bat. Ekaina heltzeagaz batera heltzen dira bertako jaiak ere, eta gogoz daude auzotarrak aurtengoan ere. Zapatuan [ekainak 8] hasi eta astelehenera [ekainak 10] bitarte jai giroa nagusituko da bertan.

Aurtengoan ere, “betiko antzera” antolatu dituzte jaiak. Iaz “inoizko jende gehien” batu zen bertan, eta aurtengoan ere antzera ospatzeko esperantza dute. Hala, duten aurrekontuarekin “hiru egunak ahal den osoen betetzen” saiatu dira jai batzordeko kideak.

Hori horrela, tradizio bihurtzen ari den ekintza bategaz emango diote hasiera jaiei: tortilla txapelketagaz. Urteroko partaide kopuru antzekoa espero dute aurten ere: hamar talde inguru. Taldeek 20:30erako aurkeztu beharko dituzte tortillak. Ostean, jai giroak eta musikak hartuko dituzte Oletako txoko guztiak. Kittu txarangak girotuko du iluntzea, eta 23:30ean Etxeperi pasako diete erreleboa. Pandemia garaiak sorkuntza proiektu asko indartu zituen, eta Etxepe da horietako bat. Etxeperen ostean, berriz, ez da aspertzeko astirik egongo: Oxabi igoko da oholtzara. Ez da Oxabikoak Oletara joaten diren lehenengo aldia: “Oxabik uste dugu jendea ekarriko duela. Aurretik ekarri izan dugunean ondo funtzionatu du”.

Astelehenean ere kontzertuak egongo dira: Akerbeltz eta Jonkass.

Domeka [ekainak 9], berriz, “trankil” pasako dute. 12:30ean ekingo diete egunari, zelaian egongo den mezagaz. Jarraian, gainera, bertoko talde baten dantza emanaldia ikusteko aukera egongo da, Arta-Nagusi dantza taldearena, hain zuzen ere. Bazkalordua familiakoekin elkartzeko aprobetxatuko dute auzotarrek, eta arratsaldean Urtza Herri Kirol taldearen ikuskizuna egongo da: “Urteren batean musika mexikarra ekarri izan dugu, baina herri kirolak hobeto funtzionatzen dutenez, eurak etorriko dira. Agian sorpresaren bat ere emango digutela esan digute”.

Jaietako azken egunean umeak eta musika izango dira protagonista. Arratsaldean auzoko nahiz inguruko herrietako ume eta gurasoak elkartuko dira Oletan: “Astelehena izanda ere, jende piloa batzen da; iaz jende mordo-mordoa egon zen”. 17:30ean puzgarriak ipiniko dituzte, eta umeen jolasak ere egongo dira. Arratsaldea, gainera, Bat, Bi, Hiru Festa! taldeak girotuko du. Eguraldi onagaz, gainera, bide gorritik Oletara heltzeko aukera ere egongo da: “Guraso asko etortzen dira, eta eguraldi ona eginez gero bidegorritik etorri eta autobusean buelta egiten dutenak ere badaude”. Baina, horixe da euren zalantza handiena: eguraldia. “Gu Oletan urtero eguraldiari begira egoten gara. Aterperik ez daukagunez, askotan euritan ere egin izan ditugu jaiak. Momentuz aurreikuspenak ez dira oso onak, baina ea hobetzen den apur bat”.

Jaiak goi-goitik amaitzeko, 22:00etatik aurrera Akerbeltz erromeria taldeak musikatuko du gaua. Bertan abesten aritzen den Jonkassek, gainera, Akerbeltzegaz amaitu ostean ere musika jartzen jarraituko du, goizeko ordu txikiak arte.

Autobus zerbitzua. Oletako jaietara joateko, gainera, erraztasunak ipini dituzte antolatzaileek. Autoa hartzeko beharrik ez edukitzeko, zapatuan eta astelehenean Lekeitiotik autobusa ipini dute. 22:00etatik 06:00etara egongo da zapatuan, eta 22:30etik 05:00etara, berriz, astelehenean; egun bietan Mandaskatik aterako dira autobusak. Era berean, Gababusa ere egongo da: joaneko bidaietarako herri bakoitzak bere irteera ordua edukiko du, eta itzulera 03:00etan eta 05:00etan egingo dute denek, Oletako autobus geltokitik.

[EGITARAUA]