100 ume inguru batu zituen Mutrikuko Umeen Euskal Jaiak
Zapatuan [ekainak 8] ospatu zuten Umeen Euskal Jaia Mutrikun, herrian giro "ederra" sortu zela aipatu dute Gure Ametsa dantza taldeko antolatzaileek.
Argazkia: Gure Ametsa dantza taldea. Zarauzko Jalgi eta Mutrikuko Gure Ametsa dantza taldeetako 100 ume batu ziren zapatuan [ekainak 8] Mutrikun, Umeen Euskal Jaian. Euria egiteko kezka izan bazuten ere, goiz guztia iraun zuen eguraldi onak, nahiz eta arratsaldeko Joxe Mendizabalen erromeria frontoian egin behar izan zuten.
Goizean goiz eman zioten hasiera egunari, goizeko 11:30ean hasi zen kalejira Mutrikuko kaleetan zehar eta lehenengo geldialdia zaharren etxean egin zuten. Agintari, agurra, esku dantza eta zazpi jauzi dantzatu eta herriko nagusiei eguna alaitu ostean Beheko Plazara jaitsi ziren bigarren geldialdia egitera. Zabiel Plazan eman zioten amaiera kalejirari.
Arratsaldean frontoian batu ziren Joxe Mendizabalekin eta antolatzaileen arabera giro oso ona jarri zuen erromeriak. “Oso giro polita jarri zuen eta gustura egon ginen. Lekuz aldatu behar izan genuen euria zela eta”. Datorren urtera begira formatu berdina mantenduko dutela azpimarratu dute Gure Ametsa dantza taldeko antolatzaileek.
Argazkia: Gure Ametsa dantza taldea.
