"Giro polita" egon da Ziortza-Bolibarko baserritarren azokan
Bertoko nahiz inguruko ekoizle batzuek produktu guztiak saldu dituzte; beste batzuek, aldiz, salmenta "nahikotxo" egin dituzte.
Argazkia: Ziortza-Bolibarko Udala. Baserritarren azokan elkartu ziren ziortza-bolibartarrak zapatuan [ekainak 8]. Ingurumenaren Nazioarteko Eguna joan den eguaztenean [ekainak5] izan zela aitzakiatzat hartuta, hainbat ekintza antolatu zituen Ziortza-Bolibarko Udalak, Lea-Artibaiko Amankomunazgoaren, Lea-Artibaiko Landa Garapen elkartearen eta herriko taldeen laguntzagaz.
11:00etan eman zieten hasiera egunari Euskal Herriko Nekazarien Elkartasuna (EHNE) sindikatuko Unzalu Salterainen hitzaldiagaz: “Hamabost lagun inguru egon ziren hitzaldian, eta jendeak oso ondo baloratu zuen. Datu berri pilo bat eman zituen Unzaluk, eta elikaduraren munduan Euskal Herrian zelan dagoen oso ondo azaldu zigun”. Hitzaldiagaz batera, EHNEko materiala banatu zuen Salterainek.
Aldi berean zabaldu zuten azoka ere, baserritarren eta bertoko ekoizleek sei postugaz: “Giro polita egon zen. Postu batzuek eroandako dena gastatu zuten, eta beste batzuek ere nahikotxo saldu zutela esan ziguten”. Gainera, Tantai baso jabeen kooperatibak postu bat ipini zuen herritarrei informazioa eman eta aholkularitza emateko, eta baita Lea-Artibai Amankomunazgoak ere; azken horiek konposta banatzen aritu ziren.
Antolatzaileak erantzunarekin “pozik” geratu badira ere, kezka zuten Etxebarriko Ganadu Azoka ere egun berean zelako: “Hala ere, ondo atera zen. Urtero nahiko genuke egin, baina ikusiko dugu ea posible den. Printzipioz hori da apustua, Ingurumenaren Nazioarteko Egunaren inguruan antolatzea azoka, eta ahal bada Etxebarrikoarekin koinziditu gabe, apur bat osagarri izateko”. Zapatukoa euririk barik egin ahal bazuten ere, domekan egiteko zuten erreka garbiketa ezin izan zuten egin; aurrerago ipiniko dute beste data bat.
Argazkia: Ziortza-Bolibarko Udala.
