Markina-Xemeinerako garraioa eta errepidea konpontzea eskatu dute aulestiarrek
Herri batzarra egin zuten barikuan [ekainak 7] Aulestin, Aulestiko Herri Lagunkoiak deituta. Markina-Xemeinerako garraioa eta eta errepidea konpontzea eskatzeko lan taldea sortu zuten.
Argazkia: Aulestiko Herri Lagunkoia. Zortzi kilometrok banatzen dituzte Aulesti eta Markina-Xemein baina ez da erraza batetik bestera egin beharreko ibilbidea. Ikasketak burutzera edo zerbitzu desberdinak jasotzera Markina-Xemeinera joan beharra daukate aulestiarrek. “Artibai guztiarekin lotzeko ere Markina-Xemein da abiapuntua, baita Durangaldearekin konektatzeko ere, eskualdeko erdigune bihurtu da”. Beraz, guzti hori kontuan izanda, Aulesti eta Markina-Xemein lotuko dituen garraio zerbitzua ezartzearen “beharrezkotasuna” azpimarratu dute aulestiarrek.
“Aulestiarrok Markina-Xemeinera joateko daukagun aukera bakarra auto partikularrez joatea da, baina kontuan hartu behar da errepidea oso estua dela: ez dauka erdiko markarik, ezta ere bazterbiderik”. Hamabi urtetik gorako gazteak eta lanera doazen beste hainbeste aulestiarrek egunero bide hori hartu behar dutela ere aipatu dute, beraz, errepidearen erabiltzaileen segurtasunerako BI-3448 errepidea zabaltzea ezinbestekotzat jo dute.
Hainbat urtez herritarrei kezka eragin dien gaiari kolpe egin eta lan talde bat sortu zuten ekainaren 7an burutu zen herri batzarrean. “Lan talde horrek aldarrikapenak kalera ateratzeko plangintza egingo du eta herritarrak kalera ateratzeko ekintzak proposatuko ditu”. Markina-Xemeingo eta inguruetako herritarren babesa lortzea ere espero dutela azaldu dute aulestiarrek.
