"Giro polita" egon da Oletako jaietan
Zapatuan [ekanak 8] hasi eta atzo [ekainak 10] amaitu zituzten jaiak; eguraldia lagun izan ez arren, jendea "animoso" ibili da. Tortilla txapelketa Unai eta Mikel Gabiolak irabazi dute.
Euren onena emanda amaitu dira aurtengoan ere Oletako jaiak. Zapatuan [ekainak 8] hasi eta atzo [ekainak 10] amaitu zituzten, eta Oletako Jai Batzordea pozik geratu da aurtengoarekin ere, eguraldiarekin gorabeherak izan badituzte ere: “Jende gutxiago egon da, baina ikusten da jendeak ohitura hartu duela Oletako jaietara etortzeko”.
Zapatuan hala izan ez arren, atzo [ekainak 10] eguraldia lagun izan zuten Oletara bertaratu zirenek, eta eguzkitan gozatua hartu zuten umeek. Bi puzgarri eta ohe elastiko bat eduki zituzten aukeran bertoko nahiz inguruko herrietako umeek, eta ilara luzeak egin ziren batean zein bestean ibiltzeko; “ume pilo bat” ibili ziren alde batera eta bestera. Bat, bi, hiru festa! taldeak, gainera, giro ederra ipini zuen, hainbat jolas eginaz. Gautxoriek, berriz, Akerberbeltzen eta DJ Jonkassen musikagaz gozatu zuten, 22:00etatik aurrera: “Jende piloa ibili zen eta giro oso ona egon zen”.
Domekan ere, “ondo” joan zen eguna. 12:30eko mezaren ostean Arta-Nagusi dantza taldeak saioa eskaini zuen: “Dantzak hasi zirenean euri apur bat hasi zen, baina gero ondo heldu zion”. Hala, umeek dantza egin ostean, inguruko tabernetan elkartu ziren auzotarrak, famili bazkariak egiteko: “Nahiko ohikoa izaten da domekan famili bazkariak egitea, eta inguruko tabernetan giro ona egoten da”. Arratsaldean, berriz, herri kirolen txanda izan zen, ezusteko eta guzti: “Oso giro ona egon zen. Herriko Jon Arriagak eta Igor Juantorenak ere aizkoran egin zuten, Urtza herri kirol taldearekin batera. Oso ondo egon zen”.
Jaien estreinako egunean, berriz, eguraldiak ez zien asko lagundu, eta horrek eragina eduki zuen: “Eguraldia zela eta, jende gutxiago egon zen tortilla txapelketan, baina egin egin zen”. Hala, bost izan ziren parte hartzera ausartu ziren taldeak, eta Amorotoko eta Mendexako Unai eta Mikel Gabiolak irabazi zuten txapelketa. Gaua heltzerako euria ez zen gelditu, eta “jende gutxiago” ibili zen arren, bertaratu zirenak “animoso” ibili ziren: “Eguraldia izan zen pena, euria bota eta bota egon zen. Oxabiren kontzertua bertan behera geratu zen arren, jendeak animoso jarraitu ziren eta ez ziren etxera joan”. Oxabi bertan behera geratu bazen ere, aurretik Etxeperen kontzertuagaz gozatu ahal izan zuten: “Oso ondo egon zen. Gero Lekeitioko DJ batzuk zeuden inguruan, eta prest egon ziren eurak musika ipintzeko. Giro polita ipini zuten”.
Antolatzaileek bereziki azpimarratu eta eskertu nahi izan dute auzotar nahiz herritarren gogoa: “Guk ez daukagu aterperik, txosnak duen toldoa baino ez, eta jende gutxitxoago etorri zen arren zabalik dagoen taberna eta plaza nahiko beteta egon ziren. Ikusten da jendeak ohitura hartu duela Oletako jaietara etortzeko”.
