Hirugarren postua lortu du Mutrikuk gizonezkoen 640 kiloko sokatira txapelketan
Datorren zapatuan [ekainak 15] hasiko da emakumezkoen 540 eta 500 kiloko txapelketa Martiartun.
Aramaion izan zen zapatuan [ekainak 8] Euskal Herriko lur gaineko 640 kiloko Sokatira Txapelketako hirugarren jardunaldia, beraz, finala, eta Mutriku Sokatira Taldeko gizonezkoen taldeak hirugarren postua eskuratu zuen, 14,5 punturekin.
Zazpi taldek parte hartu zuten zapatuko finalean: Gaztedi A, Goiherri, Akelarre, Gaztedi B, San Jeronimo, Saturraran eta Mutriku. Eguraldi txarra aurreikusten zen arren aguantatu zuen eta ikusle asko bertaratu ziren. Lurra maldatsua eta gogorra zegoenez, hasierako tiraldiak motzak izan ziren eta nahiko azkar joan ziren baina tiraldi ederrak ere ikusteko aukera paregabea izan zuten hurbildu zirenek.
Azkenengo tiraldia Gohierri eta Gaztedi A taldeei egokitu zitzaien eta “ikusgarria” izan zela aipatu dute bertaratuek. Horrez gain, Saturraran eta San Jeronimoren arteko tiraldia ere polita eta lehiatua izan zen. Sailkapenari dagokionez, Gaztedi A izan zen lehena 20 punturekin eta Gohierri, jarraian, 19 punturekin. 14,5 punturekin hirugarren postua lortu zuen Mutrikuk. Akelarre laugarrena 12 punturekin, Gaztedi B hurrengoa 8,5 punturekin. San Jeronimo seigarren postuan gelditu zen 8 punturekin eta Saturraran zazpigarren 3 punturekin.
1979. urtean Aramaiotik Munduko Sokatira txapelketara Suediara joan zen taldeari eskainitako omenaldiarekin eman zioten amaiera txapelketari. Hurrengo zapatuan [ekainak 15] hasiko da emakumezkoen 540 eta 500 kiloko txapelketa, arratsaldeko 18:00etan Martiartun.
