Bost egunetan bost kontzertu eskainiko dituzte Musikaiaren XI. Aste Musikalean
Astelehenean [ekainak 17] hasi eta barikura [ekainak 20] arte egunero kontzertu bat eskainiko dute musika eskolako ikasleek.
Lekeitioko Musikaia Musika Eskola bere 10. urteurrena ospatzen aritu da ikasturtean zehar, eta datorren astean egingo dute 10. ekintza. Egun bakarra izan beharrean, Aste Musikala ospatuko dute 380 musikarik: “Bost egunetan bost kontzertu ezberdin egongo dira”. Izan ere, helburua asteko egun bakoitzean kontzertu bat ematea da.
Hala, astelehenean [ekainak 17] emango diote hasiera Aste Musikalari. 18:00etan musika eskolan emango dute lehenengo kontzertua: “Musika tresnetako lehenengo eta bigarren urteetako ikasle txikienek parte hartuko dute. Euren lehenengotariko kontzertua izan da”. Kasu horretan, ez du sarrera librea edukiko: gonbidapenarekin soilik joan ahalko da.
Gainontzekoek, baina, sarrera librea izango dute. Martitzen eta eguaztenean [ekainak 18 eta 19], 19:00etan, Ikusgarri Zinema Aretoak hartuko ditu kontzertuak: musika talde eta konbo ezberdinen kontzertuak eskainiko dituzte. Eguenean [ekainak 20], udaletxeko eskaileratan elkartuko dira, eta koroetako kideak izango dira protagonistak, txistulariekin batera. Hori gutxi balitz, Lekeitioko erraldoi eta buruhandiek ere parte hartuko dute: “Musikaia Egunean ezin izan zuten parte hartu eguraldi txarrarengatik, eta horren partez, eguenean egingo dute”. Gainera, kontzertua amaitzean Txirrist txarangak girotuko du iluntzea; Era berean, “zerbait berezia” egongo dela aurreratu dute antolatzaileek.
XI. Aste Musikalagaz goi-goitik amaitzeko, 18:00etan Ikusgarri Zinema Aretoan antzerki musikatua eskainiko dute ikasleek, Ponyoren abentura izenagaz.
Egitaraua:
- Ekainak 17, astelehena. 1. eta 2. mailakoen emanaldia, 18:00etan, musika eskolan.
- Ekainak 18, martitzena. Musika taldeen kontzertuak, 19:00etan, Ikusgarri Zinema Aretoan.
- Ekainak 19, eguaztena. Musika taldeen kontzertuak, 19:00etan, Ikusgarri Zinema Aretoan.
- Ekainak 20, eguena. Abesbatzak, txistulariak eta erraldoi eta buruhandiak. Mintzaira 5. maila amaitu dutenek diplomak jasoko dituzte. Ostean, Txirrist txaranga.
- Ekainak 21, barikua. Ponyoren abentura antzerki musikatua, 18:00etan, Ikusgarri Zinema Aretoan.
