Dinamartxan izena emateko egunak zehaztu dituzte
Ekainaren 25ean eta 26an egongo da Dinamartxan izena emateko aukera Musika Plazan. Mendi martxarako boluntarioak behar dira.
Ekainaren 29an ospatuko den Ondarroako Zapato Azulean egiten den Dinamartxarako zehaztapen guztiak argitaratu ditu Radixu Irratiak. Ekainaren 25ean eta 26an egongo da izena emateko aukera, 19:00etatik 21:00etara bitartean, Musika Plazan. 20 euro izango da izen ematea eta beste 20 euroren truke, kamiseta eskuratzeko aukera egongo da.
Izena emateko orduan baimena sinatu beharko da, beraz, aurrez aurre apuntatzea beharrezkoa da. Lagun baten izena emateko kasuan, norberak sinatu beharko ditu baimenak. Horrez gain, mendi martxarako, bakoitzak beste lagun bat apuntatu dezake soilik, parte hartze kopurua mugatua baita.
Ohar garrantzitsu batzuk ere bota dituzte antolatzaileek. Mendi martxarako boluntarioak beharko dituzte, zerbait gertatuz gero, laguntzera joango direnak. Boluntariorik egon ezean, martxa bertan behera geratzeko arriskua dago. Dinamartxako kirol probak “gogorrak” direla abisatu dute aldez aurretik. Baina lehiaketa ez dela ere azpimarratu dute, lagunartean lasai joatekoa baizik.
Dinamartxaren ibilbideari dagokionez, bizikletako martxa egingo dutenak goizean goiz aterako dira Tolosara, autobusean. Bizikletak aurreko eguneko arratsaldean sartuko dituzte kamioian, portuan. Mendiz mendi oinez egingo dutenek, aurreko eguneko 23:00etan aterako dira Ondarroatik autobusez.
