Hobekuntza eta egokitzapen lanak egingo dituzte Bekobenta Eskolan
Besteak beste, Haurreskolako barrakoiak kendu, espazioak berrantolatu eta kanpoan arrapala berria ipiniko dute. Lan gehienak ikasturtea hasterako amaituko dituzte.
Argazkia: Markina-Xemeingo Udala. Ume eta gaztetxoen udako opor sasoia datorrela baliatuz, hainbat obra egingo dituzte Markina-Xemeingo Bekobenta Eskolan. Markina-Xemeingo Udalak, gurasoek eta hiru zentroetako zuzendariek adostutako plana dago oinarrian, eta “aspalditik atzeman” diren espazio arazoei irtenbidea emango diete. Hala, lanak datorren urte hasierara arte luzatuko diren arren, gehienak 2024-2025 ikasturte hasierarako amaituta egongo dira.
Batez ere, bi izan dira atzeman dituzten premiak, biak ere, espazio premiei lotutako obrak: Haurreskolako barrakoiak kentzea eta Bekobenta LHLI eskolak dituen espazio premiei erantzutea. Barrakoiei dagokienez, “behin behineko” espazio moduan ipini zituztela azaldu dute, eta “denbora luzez” erabilgarri egon ostean kaltetzen hasiak daudela. Hori horrela, Haurreskolako erabiltzaile kopuruari “era egokian” erantzuteko ezinbestekotzat jo dute eraikin txikiko espazio osoa erabilgarri edukitzea. Era berean, bestelako hainbat hobekuntza ere egingo dituzte komunetan, eskaileretan eta lurzoruan.
Bekobenta LHLI eskolan, berriz, ikasgeletako espazio beharrak, sarbideak eta komunak hobetuko dituzte. Horretarako, hainbat izango dira egingo dituzten lanak. Alde batetik, bi urteko umeentzako gela ireki bikoitz berri bat eraikiko dute, gaur egun institutukoa den gela bat erabiliz: “Behe solairuko teknologia gela eta HH-LHko irakasle gelak batuko dira”.
Argazkia: Markina-Xemeingo Udala.
Era berean, eraikineko irteera berri bat ere egokitu eta beiraz estalitako sarrera estalia ere egingo dute, “HH2ko umeen sarrera-irteera gune gozo eta erabilgarria” egiteko asmoz. Azaldu dutenez, Hezkuntzako Berritzeguneak parte hartze zuzena eduki du gelaren diseinuan, “umeen autonomiaren garapenean” laguntzeko: “Bertako espazioen antolaketak eta diseinuak gaur egun inplementatzen hasi diren metodologia berritzaileei erantzuna ematen dion espazio erakargarri eta goxoa diseinatu dute”.
LHko ikasleentzako dituzten premiak kontuan hartuz, lehenengo solairuan dagoen BHIko gela bat LHrako ipiniko dute erabilgarri, aldaketa txiki batzuk eginda; aurrerago beharrak aldatu eta BHIk gela behar izanez gero, berreskuratzeko aukera edukiko luke.
Kanpoan ere, aldaketak. Ikastetxe barruan egingo dituzten aldaketez gain, kanpoan ere arrapala berri bat ipiniko dute. Larrialdiren bat gertatuko balitz Haurreskolako lehenengo solairua behar bezala ebakuatzea ahalbidetuko du arrapala berriak, izan ere, Haurreskolako eraikineko lehenengo solairuraino ipiniko dute. Era berean, itxarote eremu estalia sortu eta umeen kotxeak bertan gordetzeko espazioa egotea ere erraztuko du.
