Jaia eta borroka uztartuz, Galarrena Eguna ospatuko dute zapatuan
Egun guztiko egitaraua antolatu dute zapaturako [uztailak 13]. Herri bazkarian 150 lagunetik gora elkartuko dira; tiketak salgai egongo dira bihar [uztailak 12] arratsaldera arte.
Lekeitioko Galarrena iazko udazkenetik itxita egon ostean, joan den maiatzaren 31n ireki zituen berriro ere bere ateak, eraberrituta. Oinarri ideologiko berdinekin zabaldu zuten berriro ere herritik eta herriarentzako sortu zen gunea, eta ordutik hilabete gutxi igaro diren arren, Galarrena eraikinak 25 urte beteko ditu uztailaren erdialdean. Hori horrela, Galarrena Eguna ospatuko dute zapatuan [uztailak 13] egun osoko egitarauagaz.
Ospakizun betean murgilduko diren arren, Galarrenako kideek gogorarazi nahi izan dute aldarrikapenak egiteko eguna ere izango dela: “Iluntzean eskolapean ekitaldi politikoa egingo dugu. Galarrena herrigintzarako espazio bat da, herritik eta herriarentzat sortu zena. Ezker abertzalearen oinarri ideologikoak betetzeko, jaiagaz batera, aldarrikapenak ere egin nahi genituen. Beraz, Galarrena balioan ipiniko dugu: herrian duen garrantzia, jokatzen duen papela… Ze, ez da taberna soil bat, herriari zabalik dagoen eraikina ere bada”.
Beraz, aldarrikapena eta jaia, biak uztartuko dituzte zapatuan. Goizeko mendi martxaren eta gazte ginkanaren ostean, herri bazkarian elkartuko dira. Gaur gaurkoz, 150 lagunek eman dute izena, baina, 200 inguru espero dituzte. Bazkaritarako tiketak salgai egongo dira bariku [uztailak 12] iluntzera arte; 15 euro balio ditu nagusienak, 10 euro gazte eta langabetuenak, eta 5 euro, umeenak. 19:30eko ekitaldi politikoaren aurretik eta ostean, elektrotxaranga arituko da musika jartzen, eta gauerdian DJak egongo dira.
Umeek ere izango dute euren tokia. Goizean jolasak egiteko aukera edukiko dute, eta herri bazkariaren aurretik, 14:00etan umeen bazkaria egongo da. 15:00etan, berriz, mural margoketa egingo dute.
Egitaraua
- 10:00. Mendi martxa, eskolapetik.
- 12:00. Gazte ginkana, plazatik.
- 15:00. Herri bazkaria.
- Ostean. Bingo musikatua.
- 18:30. Zutik elektrotxaranga, plazatik.
- 19:30. Ekitaldi politikoa, eskolapean.
- Ostean. Elektrotxaranga.
- 00:30. DJak, Galarrenan.
- Umeen txokoa. 12:00etan, jolasak; 14:00etan, umeen bazkaria; 15:00etan, mural margoketa.
