San Migel Futbol Zelaia erabili dezakete herritarrek irailera bitartean
Herritarrentzat erabilgarri jartzeko helburuagaz, Mutrikuko Udalak futbol zelaiko ateak irekiko ditu udan, 10:00etatik 21:00etara.
San Migel Futbol Zelaian belar artifiziala jarri zutenetik izan du Mutrikuko Udalak udan futbol zelaiko ateak irekitzeko asmoa, eta aurten, martxan jarri du proposamena. Behin kirol jarduerak amaituta, herritarrentzako eskuragarri egongo da, 10:00etatik 21:00etara. “Futbol zelaia herriko ondarea den heinean, asteburu hontatik irailera arte herritarrentzat erabilgarri egongo da”.
Mutrikuko Udaletik hainbat xehetasun eman dituzte futbol zelaiaren erabilpenaren inguruan, “guztion artean zaindu behar dugu eta erabilpen txarra emanez gero, ateak ixtera behartuta egongo ginateke”. Horrez gain, herritarrek lehentasuna izango dute eta herriko kirol elkarteek entranamendu saioak hasten dituztenean, ordutegi berriak finkatuko dira. Herriko Eskola Kirol egiturak eta Txantxangorri Aisialdi taldeak ere lehentasuna izango dute goizean dituzten udalekuetan.
Debekatuta dauden jarduerei dagokienez, udaletik hainbat zertzelada eman dituzte: “Debekatuta dago futbol zelaian jan edo edatea, baita erretzea. Horrez gain, ezin dira bizikleta, patinak, umeen aulki edo bestelako edozein gailu erabili”. Kanpoko taldeek debekatuta izango dute entrenamendu saioak egitea eta futbol zelai osoa ezingo da hartu, “herriko kuadrillek edo lagun taldeek futbol 8ko zelaiak erabili beharko dituzte, inoiz ez zelai osoa, udalaren baimen berezia beharko da horretarako”. Futbol zelaiaz gain, goiko komunak ere irekita egongo dira.
Mutrikuko Udaletik araudia errespetatzea eskatu dute, “araudia errespetatzen ez duena futbol zelaitik kanporatua izango da. Norbaitek futbol zelaiaren erabilpen okerren bat ikusiz gero, jakinarazi udaltzainei, 679162500 telefonora deituta”.
