Itxas Soinua Nazioarteko Musikaldiaren aro berria "oso ondo" hasi da
Gau Klasikoak egin dituzte asteburuan. Etzi eta barikuan [uztailak 25 eta 26] Aldapeko Basque Latin eta Xahu Quartet taldeek emango dituzte kontzertuak.
![Vocalia abesbatza, Lekeitioko Itxas Soinua Nazioarteko Musikaldian. Argazkia: Itxas Soinua Nazioarteko Musikaldia.](https://lea-artibaietamutriku.hitza.eus/site/files/2024/07/1-1-1200x676.jpeg)
Aldaketaz beteta, joan den asteburuan hasi zuten Itxas Soinua Nazioarteko Musikaldiaren aro berria, eta “oso ondo” gainera. Antolatzaileak “oso pozik” geratu dira musikaldiaren lehenengo asteburuak izan duen erantzunarekin: “Oso pozik gaude, balorazioa positiboa da guztiz. Erantzun oso ona egon da ikusentzuleen aldetik”.
Guztira, hiru egunetako ikusleak batuz, 500 lagunetik gora elkartu dira Andra Mariaren Zeruratzea Basilikan. Barikuan [uztailak 19] Euskadi Brass taldearen kontzertua egon zen; zapatuan [uztailak 21] Oiasso Kamerataren txanda izan zen, eta domekan [uztailak 21] aldiz, Vocalia Abesbatzarena. Antolatzaileak bereziki pozik geratu dira Vocalia Abesbatzak izan zuen erantzunarekin: “Oso-oso pozik gaude. Ikusleak zutik eta txaloka amaitu zuten, ikusgarria izan zen. Hirurek erakutsi zuten sekulako maila”.
![Oiasso Kamerata, Lekeitioko Itxas Soinua Nazioarteko Musikaldian. Argazkia: Itxas Soinua Nazioarteko Musikaldia.](https://lea-artibaietamutriku.hitza.eus/site/files/2024/07/1-2-500x376.jpeg)
Oiasso Kamerata. Argazkia: Itxas Soinua Nazioarteko Musikaldia.
Asteburuan izango diren Gau Modernoetarako ere “aurreikuspen onak” dituzte: “Sarrera asko saldu dira jada, eta saltzen ari dira oraindik”. Etzi [uztailak 25] Aldapeko Basque Latin taldearen txanda izango da, 20:00etan, Ikusgarrin. Musikaldiaren azken egunean berriz, barikuan [uztailak 26] Xahu Quartet igoko da oholtzara, ordu eta toki berean. Sarrerak salgai daude www.itxasoinua.com web orrialdean; sarrerarik geratuko balitz egunean bertan leihatilan ere ipiniko dituzte salgai.
![Euskadi Brass, Lekeitioko Itxas Soinua Nazioarteko Musikaldian. Argazkia: Itxas Soinua Nazioarteko Musikaldia.](https://lea-artibaietamutriku.hitza.eus/site/files/2024/07/1-3-500x333.jpeg)
Euskadi Brass taldea. Argazkia: Itxas Soinua Nazioarteko Musikaldia.