'Ezetz iarri' potineko Igor Barainkak irabazi du Antzar Jaiko sari nagusia
Zazpi jasoera egin ditu, eta burua ere lortu du. Hurrengo saria 'Aixpuru' bateleko Paul Akarregik eskuratu du, zazpi jasoera kokota kendu barik. Guztira 104 potinek parte hartu dute.
Mahoizko alkondara urdinek hartu dute Lekeitio, izan ere, heldu da urtebetez itxaroten egon diren eguna. Gaurko [irailak 5] Antzar Eguna berezia da bertakoentzat, baina kanpotarrak ere ugari biltzen dira herrian. Antzar Jaiak 16:00etan egin du eztanda, eta Ezetz iarri potineko Igor Barainka izan da irabazlea, zazpi altxaldi eta kokota lortuta; dotoretasunaren saria ere eurek lortu dute. Hurrengo saria, altxada gehien kokota kendu barik, Aixpuru potineko Paul Akarregik lortu du.
Urduri eta alai aldi berean, Itxaropena txistulariak plazara heltzeagaz batera Antzar Jaian parte hartuko duten potinen zozketa hasi da. Aurten 104 izango dira parte hartzaileak: 84 lekeitiarrak eta ingurukoak eta 20 kanpotarrak. Urteroko legez, aurtengoan ere izan da zapatilak, alkondara edo boltsa kendu behar izan duenik, baina denek bete dute beharrezko pisua. Hala, “Trabolak” potinak lortu du lehenengo postuan irteteko txartela. Azken zenbakia, aldiz, iaz zigorra jaso zuten “Uso Pase” potinekoentzat izan da.
16:00ak heldu eta minutu erdirik galdu barik ekin diote lekeitiarrek Antzar Jaiari. Trabolak potinak estreinatu du aurtengo Antzar Jaia, baina ezin izan dute antzara ukitu ere egin. Izan ere, minutu bat eta erdi baino gehiago behar izan dute antzararaino heltzeko. Laugarren potinagaz, Zer darabixu potinagaz, heldu da lehenengo altxada: Olatz Martiartuk altxada bat ez ezik, gaurko jaiko lehenengo kokota ere lortu du.
Jaia hasi eta ordu erdi baino gehiago behar izan dute harrapatzaileek bi altxaldi baino gehiago egiteko: Earradabixu 20. potineko kideak izan dira horretan lehenengoak. Antzara gora eta behera, 17:00ak jo orduko euria hasi den arren, ez da oztopoa izan Ezetz Iarri bateleko Igor Barainkarentzat: zazpi altxaldi egin ditu eta kokota ere eskuratu du, eta beraz, bera izan da aurtengo irabazlea. Gainera, dotoretasunaren saria ere eurentzat izan da. Aixpuru potineko Paul Akarregik ere ez du hutsik egin, eta zazpi altxaldi eta kokota lortuta, berak irabazi du hurrengo saria. Hiru orduz antzaragaz gora eta behera ibili ostean, 19:00ak jotzerako amaitu da Antzar Jaia; 104 ontziek parte hartu ahal izan dute aurtengoan.
Irabazleak. Ezetz iarri potineko harrapatzaileak egin ditu lepoagaz altxaldi gehien (7 altxaldi). Lepo gabe, ostera, altxaldi gehien Aixpuru potineko harrapatzaileak egin ditu (7 altxaldi).
- Jasoera gehien buruagaz (7 jasoera): 43- Ezetz iarri– Igor Barainka Erkiaga ( 300 euro eta txapela)
-
Jasoera gehien burubarik (7 jasoera): 77- Aixpuru – Paul Akarregi Lasaga ( 300 euro).
-
Dotoretasuna (150 euro): 43- Ezetz iarri – 0:51 segndo eta 14 puntu. Eslogana: “4. aldia antzarretan. Altzada gehien 9 (Join Seijok 2023an)”.
-
2024ko Antzar Jaian zenbakia aukeratzeko aukera izango dute, igoera gehien egin dutelako: 57- Aittitta Modesto (7 igoera); 49-Maaxa (6 igoera); 65- Drangadia (5 igoera); 55- Apurtuarte (5 igoera); 60- Trankulo (5 igoera).
Urtero banatzen dituzten hiru sariez gain, aurtengoan kokota kentzea lortzen duten harrapatzaile guztiek ere saria eta oroigarria jasoko dituzte. Antzar Batzordeak gogorarazi du aurtengo sari banaketa plazan izan beharrean, Limoneroan izango dela, bihar [irailak 6], 20:00etan.
