Magia ikuskizuna eta tailerra eskainiko ditu Oier magoak Markina-Xemeinen
Ikuskizuna barikuan [irailak 13] izango da, eta tailerra, berriz, zapatuan [irailak 14]. Baterako zein besterako, izena eman behar da.
Magiagaz gozatzeko aukera edukiko dute markina-xemeindarrek asteburuan. Oier magoak Magic delivery bere magia saio berria eskainiko du barikuan [irailak 13], 17:00etan, Uhagonen. Sarrera 3 euroren truke eskuratu daiteke 94-616 63 03 telefono zenbakira deituz; bazkide direnek, ostera, doan ikusi ahalko dute saioa.
Gainera, gozatu bakarrik ez, magia egiten ikasi ere ahalko dute hala nahi dutenek. Izan ere, zapatuan [irailak 14] magia tailerra eskainiko du Oier magoak. 8 urtetik gorakoentzako saioa izango da, eta ordu bete iraungo du: 10:30etik 11:30era elkartuko dira Uhagonen. Hala, tailerra doan izango den arren irailaren 12a baino lehen izena eman behar da 94-616 63 03 telefonora deituz.
