50 langiletik gora elkartu dira Eikako euskararen egunean
Eikak euskaragaz duen konpromisoa berretsi, eta jai giroan ospatu dute euskararen eguna.
Argazkia: Eika. Joan den barikua [iraialk 20] ospakizun eguna izan zuten Eikan. 50 langile baino gehiago elkartu ziren Markina-Xemeinen, euskararen eguna ospatzeko asmoz. Hemeretzi urte pasa dira euskararen eguna lehenengoz antolatu zutenetik: “Ekintza honekin, Eikak argi adierazi nahi du arlo sozio-ekonomikoa euskalduntzearekin duen konpromiso sendoa, baita Lea-Artibai eskualdean euskaraz lan egiteko aukerak eskaintzearekin ere”
Hori horrela, egun guztiko egitarauaren bueltan batu ziren eikatarrak. Mendizaleak direnek goizean goiz eduki zuten gozatzeko aukera: 09:00etan Arretxinagako plazan elkartu ziren Akarregi mendira igotzeko. Bi orduko ibilaldiaren ostean, Josu Martinez zuzendariaren Bizkarsoro filma ikusi zuten: “1914tik 1982ra bitartean euskaraz bizitzeagatik jazarriak izan ziren bost istorioz osatutako filmarekin gozatu genuen, eta hunkitu ere egin ginen”.
Goizeko jarduna amaituta, eguerdikoari hasiera triki poteoagaz eman zieten. Uhagonen hasi eta Markina-Xemeingo alde zaharrean ibili ziren festa giroan. Handik, Uhagonera itzuli ziren berriz, eta mokadua egiteko aukera eduki zuten: “Mokaduan, oraingo langileek eta erretiratutako langileek aukera aparta izan zuten giro atseginean elkarren berri izateko”. Hala, jan-edana amaituta, Nerea Gartzia aurkezlearen gidaritzapean hainbat jolas egin zituzten parte-hartzaileek, barre algara artean.
Euskaragaz konprometituta. Lehenengo euskararen eguna duela hemeretzi urte antolatu bazuten ere, 25 urte bete dira Eikan euskara plana martxan ipini zutenetik: “Asko dira Eikak laneko funtzionamenduan izan dituen lorpenak, euskararen erabilera ia erabatekoa izanik”. Izan ere, Eikan ezarrita dagoen hizkuntza politikaren arabera, euskara izan behar da bertako lan hizkuntza: “Horren adierazle dira orain arte lortu ditugun goi mailako hiru Bikain euskararen kalitate ziurtagiriak”.
Gaineratu dutenez, Eikak konpromiso aktiboa dauka inguruko beste enpresa eta erakunde batzuek ere euskararen erabilera normalizatu dezaten: “Aktiboki eragin eta parte hartzen dugu Lea-Artibai eskualdeko eta Mondragon korporazioko batzordeetan, eta baita arlo-sozioekonomikoko Indeus zein Euskaragileak bezalako foroetan ere”. Horretarako, Eikak beharrezkoak diren baliabideak ipintzen ditu, “urrats sendoak eman eta lortutakoak mantentzeko”.
