Musika eta dantza nagusi Aulestiko Santa Eufemi jaietan
Irailaren 16an [domeka] hasi zituzten Santa Eufemiko jaiak aulestiarrek eta atzo [irailak 22] eman zieten amaiera. Amaiur Etxeandiak eta Xuban Muniozgurenek irabazi zuten 43. Ermita igoera.
Santa Eufemiko jaietan erromeriarekin dantzan. Argazkia: Karmele Goitiandia. Erromeria doinuek girotu zuten atzo [irailak 22] Aulestiko Santa Eufemiko zelaia jaietako azkenengo egunean. Musika eta dantza protagonista izanik, egun biribila igaro zuten aulestiarrek: “Oso ondo joan dira jaiak orokorrean eta espero genuena baino jende gehiago igo da Santa Eufemira. Atzo, eguraldi txarra zegoen iragarrita eta egitarauaren zati bat bertan behera uztekotan egon ginen, baina azkenean eguraldia portatu zen eta sekulako giroa eduki genuen”, aipatu dute antolatzaileek.
Jai Bartzordeak eta Aulestiko Udalak antolatutako egitarauak aldaketa handirik izan ez arren, pandemia aurreko formatuagaz bueltatu dira aurten: “Gure helburua pandemia aurreko giroa berreskuratzea izan da. Eta esan genezake, lortu dugula. Zelai guztia dantzan ipini zuen Eingo erromeriak eta sekulako giroa sortu zen. Magikoa izan zen. Gainera, azken aldian aurrera eramaten ari garen Herri txikiak bizirik! dinamikari erreferentzia eginez eman zion amaiera kontzertuari”.
Egun berezia izan zen atzokoa herritarrentzat, jendetza batzeaz gain, txapelketez jositako eguna izaten da eta. Hitzordu ukaezina bilakatu da urteroko Ermitarako igoera, eta aurten, 43.na izan da. Guztira 49 lagunek hartu dute parte; 10 emakumek eta 39 gizonezkok. “Urtez urte geroz eta jende gehiagok parte hartzen du lasterketan eta emakumezkoem kopuruak ere gora egin dute. Indarra hartzen doan igoera bat da”. Emakumezkoen artean, Amaiur Etxeandia zornotzarra gelditu zen lehen postuan, sei minutu eta zazpi segundoko denboragaz, bere atzetik, hamahiru segundoko aldeagaz Nahia Elezgarai berriatuarrak eskuratu zuen bigarren saria. Hirugarrena, Ane Rekalde larrabetzuarra izan zen, sei minutu eta hogeita bederatzi segundoko denboragaz. Gizonezkoen sailkapenean, Xuban Muniozguren markina-xemeindarra izan da lehenena, lau minutu eta bost segundoko denboragaz, bigarrena, Paul Ormaetxea muruetarra 4 minutu eta bederatzi segundoko denboragaz eta hirugarrena Julen Aranguena kortezubitarra, lau minutu eta hamabi segundogaz. Gaur gaurkoz inork ezin izan du Aranguenak 2005ean egindako denbora hobetu, eta gainera, 10. aldiz jantzi zuen txapela pasa den urteko 42. Ermita igoeran.
43. Ermita Igoera. Argazkia: Arrolape Mendi Kluba,
32. Irrintzi txapelketa izan zen eguneko beste lehiaketetako bat, eta nahiz eta parte hartzea pasa den urtekoa baino baxuagoa izan, ermita inguruak irrintziz berotu zituzten sei irrintzilariek. Bakarne Oñederrak eskuratu zuen lehenengo saria, Lorea Zarragoikoetxeak bigarrena eta Nerea Foruriak hirugarrena. Honen ostean, bola joko txapelketarekin eman zioten jarraipena egunari aulestiarrek eta ondoren, Bizkaiko 33. Hiru Txirlo bola joko txapelketaren ordua izan zen. Boni Plaza markina-xemeindarra izan zen garailea sailkapen orokorrari dagokionez, 46 txirlorekin. Sergi Rodriguezek eskuratu zuen bigarren postua 43 txirlorekin eta hirugarrena Sebas Aranzabalek 39 txirlorekin. Jon Aransolak Aranzabalen puntuazio berdina lortu zuen, laugarren postua lortuz. Emakumezkoei dagokienez, Isana Gorosabel izan zen irabazlea 22 txirlorekin eta Amaia Kortak lortu zuen bigarren postua 18 txirlorekin. Hirugarren postua Olatz Aranok eskuratu zuen, bigarrenaren puntuazio berdinagaz. Gazteen kategorian, Luken Martino izan zen garaile, 31 txirlorekin. Bikoteei dagokienez, Mateo Guenaga eta Boni Plaza izan ziren garaileak, 77 txirlorekin. Bigarren postua, Jabier Osoro eta Sebastian Aranzabalek eskuratu zuten, 78 txirlorekin eta hirugarrena berriz, Jose Angel Fernandez eta Jon Aransolok, 73 txirlorekin. Taldeetako kategorian, Jota Bota taldea izan zen garailea 153 txirlorekin.
Argazkia: Bizkaiko Hiru txirlo.
