Andraetxeak ikasturte berriagaz batera goiko solairua estreinatuko du
Barikuan [irailak 27], 18:00etan, elkartuko dira lekeitiarrak Andraetxean, goiko solairua inauguratu eta urteko funtzionamendua zehazteko.
Iraileko azken egunak heltzeagaz batera hasiko dute ikasturtea Andraetxeko kideek. Etzi [irailak 27], 18:00etan, elkartuko dira bertan jada bazkideak direnak nahiz izan nahi dutenak, eta ikasturtearen norabidea zein izango den finkatuko dute. Hori gutxi balitz, Andraetxeko eraikinaren bigarren solairua ere inauguratuko dute.
Bigarren solairua inauguratzeagaz batera, ikasturtean egingo diren txandetan izena emateko aukera ere egongo da. Aurtengoan, gainera, berritasunekin datoz: ekainean joan den ikasturteko balorazioa egin zuten, eta txandak eguaztenetatik eguenetara pasatzea erabaki zuten. Hori horrela, aurtengo ikasturtean eguenetan izango dira txandak. Jada bazkide direnek, beraz, urritik ekainera bitarteko txandak betetzeko aukera edukiko dute.
Eguenetan txanden bitartez zabalduko duten arren, gainontzeko egunetan ere bazkideek Andraetxea irekitzeko aukera edukiko dute, eta baita ekintzaren bat antolatzeko ere. Joan den ikasturteko ekintzak eguaztenetako txandekin batera ziren arren, aurten ez da hala izango: “Konturatu ginen helburua ez zela ekintzak egitea, baizik eta, Andraetxea zabaldu eta elkarrekin egotea, hortik eztabaida, hausnarketa eta proiektu ezberdinak irteteko espazio moduan”.
Andraetxeko kideek gogorarazi nahi izan dute Andraetxea tresna moduan jaio zela: “Lekeitio herri feminista nahi dugu eraiki, eta bide horretan, Andraetxea Lekeitio eraldatzeko espazio edo tresna moduan definitu genuen. Bide horretan ikasturte honetan ere helburuak ditugu”. Horretarako, besteak beste, formakuntza ezberdinak zehaztu dituzte. Alde batetik, batukada feminista bat sortzeko ikastaro bat egongo da. Bestalde, emakume migratzaileen eskaerari erantzunaz, emakume migratzaileen eskubideen inguruko formakuntza eskainiko dute. Azkenik, hilekoaren zikloaren inguruan hitz egiteko espazio bat ere antolatuko dute. Ikasturteko formakuntzen inguruko informazioa jasotzek aukera ere egongo da barikuan.
Andraetxeko goiko solairua, berrituta. Argazkia: Andraetxea.
