'Geoaltxorraren bila’ jokoa prestatu du Geoparkeak
Geodibertsitatearen Nazioarteko Egunaren harira, urriaren 6tik 20ra egingo den lehiaketaren berri eman du Geoparkeak.
Geodibertsitatearen Nazioarteko Eguna (urriak 6) zabaltzeko asmoz, Geoaltxorraren bila izeneko lehaiaketa antolatu du Euskal Kostaldeko Geoparkeak. Izan ere, domekatik urriaren 20ra egingo den lehiaketaren bidez, Geoparkean dauden zortzi altxor geologikoak bertatik bertara eta modu ludikoan ezagutaraztea bilatu gura du Geoparkeak. Hala, horiek ezagutzera animatzen direnak ere saritu gura ditu..
Geologia Interesguneak (GIG) izenagaz ezagutzen dira, eta Euskal Kostaldeko Geoparkean egindako GIGen inbentarioen arabera, balio zientifiko handiko 65 gune daude bertan. Hala, aisialdia eta teknologia uztartzen dituen jokoak GIG inbertarioaren zortzi interesgunetan jarriko du arreta. “Horietara oinez iristea erraza da, baina ahalegin handiagoa eskatzen duten beste bi altxor ezagutzea ere proposatuko dugu, eta horiek sari potoloagoa izango dute”, azaldu dute antolatzaileek.
Hala, parte hartu gura dutenei zapata egokiak janzteko gomendioa luzatu diete, hurrengoak pausoak ondo jarraitzeko. Izan ere, urriaren 6tik 13ra bitartean, egunero, Geoparkearen sare sozialen bidez (Instagram, X, Facebook) koordenada bat argitaratuko dute, eta hori norbere gailuan sartu beharko da, bertara joateko. Han, Geodibertsitatearen Nazioarteko Eguna esaldiagaz identifikatutako QR kodea bilatu beharko dute –inguruko informazio panel edo seinaleetan egongo da–, eta hori erabiliz, puntuari buruzko fitxa zabaldu eta arretaz irakurri beharko dute parte hartzaileek. Fitxaren amaierako galderari erantzun eta antolatzaileekin harremanetan jartzeko jarraibideei kasu egin beharko diete segidan.
Urriaren 20an amaituko da jokoa, eta irabazleen izenak jakinaraziko dituzte, hiru mailatan banatuta. Batetik, erantzun bat edo beste bidaltzen dutenen artean, Biodibertsitateari buruzko apunteak liburua zozketatuko dute; bestetik, jokoaren sei erantzunak bidaltzen dituztenen artean, liburu hori eta bi lagunentzako Geoparkeko bisita liburua zoketatuko dute; azkenik, zortzi erantzunak bidaltzen dituztenei, bi opari horiez gain, tokiko produktuen GeoGourmet saria zozketatuko dute.
Balio handiko lurraldea.
Hori guztia, domekako Geodibertsitatearen Nazioarteko Egunaren harira egin dute, lurraldearen aniztasun geologikoaren garrantzia agerian uzteko egunagatik, hain zuzen ere. Izan ere, egunaren garrantzia azpimarratu gura dute, geodibertsitateak erabat baldintzatzen dituelako lurraldeko historia eta kultura. Horrez gainera, diruz nekez kuantifikatu daitezkeen baliabideak eta zerbitzuak ematen dituela gehitu dute: “Erliebea, klima, harriak eta lurzoruak dira gure ekosistenek sorten dituzten prozesu biologikoen oinarria. Beraz, Geodibertsitateak biodibertsitateari eusten dio”.
Ondorioz, Geoparke bat balio geologiko handiko lurraldea da, zeinek toki garapeneko estrategiak garrantzia berezia ematen dion lurralde horretako ondare geologikoari. “Geoparkearen definizioak bere baitan hartzen du Geologia Interesguneen presentzia, eta horiek islatzen dute lurralde horretako ondare geologikoa”, gehitu dute. Zerrenda hori lurralde honen geologiaren erakusgarri dela diote, eta lekurik “berezienak eta bakanenak” hartzen ditu barne.
