Naia Arantzamendiren 'Koaxi' filma Etxe Betea proiekturako hautatu dute
Ondarrutarrak ‘Koaxi’ filma lantzeko 'Gela bat norberarena' izeneko egoitza artistikoan egonaldia egingo du. Emakume zinemagileei bideratutako proiektuaren bosgarren edizioa da aurtengoa.
Argazkia: Etxe betea. Etxe Betea proiektuak antolatutako Gela bat norberarena izeneko egoitza artistikoan egonaldia egiteko hautatu dute Naia Arantzamendi ondarrutarra, euskarazko Koaxi proiekturekin. Bosgarren edizioa da honakoa, eta emakume zinemagileei bideratuta dago, ikuspuntu feminista batetik. Estibaliz Urresola bezalako zinemagileak igaro dira bertatik.
Gela bat norberarena 2017an sortutako proiektua da, Gariza Films ekoiztetxeak antolatutakoa, Basque Know Hox Fundazioak bultzatutakoa, eta BBK eta Eusko Jaurlaritzak babestutakoa.
Arantzamendik gela fisiko bat izango du bederatzi hilabetez, Bilboko eraikin esanguratsu batean, eta 5.000 euroko laguntza ekonomikoa. Ondarrutarrak egoitzarako aholkularia zein izango den proposatuko du eta Etxe Betea taldeko kideak arduratuko dira Arantzamendiren proiekturako egokiena lortzen. Gainera, egoitza artistikoaren barruan, parte hartzaileek akonpainamendu feminista bat izango dute. “Iazko edizioan hasi ziren bigarren beka ematen, orain arte, bakarra ematen baitzuten. Gaur egun, euskarazko proiektua egindako zinemagileari bideratutakoa, eta beste edozein hizkuntzatan egindakoari bideratuta ematen dute”, aipatu du Arantzamendik.
2024ko urritik 2025eko ekainera arte iraungo du egonaldiak, eta egoiliarra eta aholkularia hilean behin bilduko dira. Emakume zinemagileek proiektuak garatzeko aukera zabaltzea da helburua, eta hauen lana ikustaraztea.
Koaxi. Koaxi luze metraila da Naia Arantzamendiren lana, eta proiektu hori lantzen ibiliko da urritik ekainera bitartean egingo duen egonaldian. Herri arrantzaleekin lotura duen istorio bat kontatzen du lanak, 1979an kokatuta dagoena: “Nahiz eta nik istorioa Ondarroan irudikatu dezakedan, edozein herri txiki arrantzaletan kokatu daiteke. Arrantzaren sektorea gorengo puntuan zegoen garaian, lizentzien murrizketak ezarri zituzten, eta herrian ezinegona sortu zen, une nahasiak izan ziren. Horren guztiaren erdian dago nire protagonista. Emakumea da bera, eta alargun gelditu ostean, txaluparen kargua hartzen du, honek suposatzen duen guztiarekin. Bera da lehorreko arduraduna, hortaz, gizon guztiei agintzen diena. Testuinguru horretan kokatzen da nire proiektua”.
