"Oso polita" izan da Harriak ekimenaren aurkezpena
Ibon RG musikariagaz kontzertua eskaini dute Tarine udal musika eskolakoek, eta Maider Gonzalo artistagaz egindako lanen erakusketa zabaldu dute Markina BHI-ko eta Berakruz Ikastolako Bigarren Hezkuntzako ikasleek.
Erakusketa. Argazkia: Uhagon Kulturgunea. Zapatuan [urriak 5] Karmengo elizan elkartu ziren markina-xemeindarrak hainbat herritarrek maite dutena ezagutzeko asmoz. Izan ere, Harriak ekimenean murgilduta ibili dira Tarine udal musika eskolako, Markina BHIko eta Berakruz Ikastolako DBHko hainbat ikasle, Gabriele Muguruza arte komisarioak aukeratutako Ibon RG musikariarekin eta Maider Gonzalo artistarekin lanean. Hala, 18:00etan Ibon RG-k eta Tarineko hainbat abeslarik kontzertua eskaini zuten elizan, eta 19:00etan Gonzalok eta DBHko ikasleek prestatutako erakusketa inauguratu zuten.
Antolatzaileek inaugurazioaren balorazio “oso ona” egin dute: “Oso polita izan zen. Polita izan zen jende ezberdin asko elkartu ginela, bai herrikoak eta baita Bilbo eta inguruko jendea ere”. Giroa ere ederra egon zela nabarmendu dute: “Kontzertua oso ondo joan zen, eta oso polita izan zen. Korokoak denboraz larri ibili diren arren, fenomeno egin zuten dena. Kontzertuaren ostean erakusketara joan ginen, eta jende asko gerturatu zen: tailerrean parte hartutako ikasleak, irakasleren bat ere bai… oso giro polita egon zen”. Era berean, Uhagoneko teknikarien lana ere eskertu dute antolatzaileek: “Eurekin lan egitea ere oso erraza izan da, eta horrek asko erraztu du dena”.
Bi artistak ere pozik daude Markina-Xemeinen eduki duten esperientziagaz: “Maiderrentzat, adibidez, tailerrei dagokienez, bere lehenengo esperientzia izan da Bigarren Hezkuntzan. Alde horretatik erronka bat izan da, baina oso pozik geratu da bera ere egindako lanagaz. Ibonentzako ere, plazer bat izan dela esan digu, halako organo bat jotzeko aukera edukitzea asko gozatu du”.
Kontzertua behin bakarrik ikusteko aukera egon zen arren, erakusketa zabalik egongo da urriaren 31ra arte. Gainera, urriaren 11n Gonzalogaz bisita gidatua egiteko aukera ere egongo da; izena emateko kulturgunea@uhagon.com helbidera idatzi behar da.
Erakusketako ordutegiak.
- Eguenak. 18:00etatik 20:00etara.
- Barikuak. 18:00etatik 20:30era.
- Zapatuak. 11:30etik 14:00etara eta 18:00etatik 20:30era.
- Domekak eta jaiegunak. 11:30etik 14:00era.
Kontzertua. Argazkia: Uhagon Kulturugunea.
