Aulestiko III. Gabon Azokan izena emateko epea zabalik dago
Azaroaren 30ean egingo dute III. Gabon Azoka Aulestin. Izena emateko epea zabalik dago urriaren 20ra arte.
Azaroaren 30ean artisau eta ekoizleen plaza bihurtuko da Aulestiko frontoia. Izan ere, hirugarrenez antolatuko du udalak Gabon Azoka, “artisau eta ekoizleek lantzen duten produktuei garrantzia aitortu eta herritarrengana hurbildu, Gabonetako kontsumoa kalitatezko produktuetara bideratu eta bertoko artisau eta ekoizleei bultzada emateko” helburuagaz. Urriaren 20ra arte egongo da eskaria egiteko epea zabalik.
Parte hartzeko bete beharreko baldintzei dagokienez, lau zehaztu ditu udalak: “Salgai jartzen diren produktuak norberak ekoiztuak izan behar dira, eta ez da birsalmentarik onartuko. Horrez gain, postua jarri nahi dutenek eskaera orria bete beharko dute, eta elikagaien salmenta egiten duten ekoizleen kasuan, Ekonomia Jardueren gaineko Zergan alta emanda egon beharko da eta elikagaiak maneiatzeko karneta aurkeztu beharko da”. Herriko irabazi asmorik gabeko erakundeentzat ere tokia egongo dela zehatu dute, “egun horretako jardunetik jasotzen duten diruaren helburua herrigintza bultzatzeko izanik”. Udalak esleituko ditu postuak, “irizpideak kontuan hartuta eta lekuaren arabera”.
Urriaren 7tik 20ra bitarteko epean egin beharko da baimena eskatzeko eskaria, Aulestiko Udaleko webgunean egin daiteke modu digitalean, edo baita, eskaera orriaren bidez; Aulestiko Udalean entregatuta, 9:00etatik 14:00etara bitartean edo posta bidez bidalita administraria@aulesti.eus helbidera. Bertan, 16 posturentzako lekua egongo dela eta parte hartzaileek ez dutela lekuaren erabilera tasarik ordaindu beharko adierazi du Aulestiko Udalak.
Prozedurari dagokionez, behin eskakizunak jasota, udalaren eskumena daukan organoak erabakiko du baimena eman edo ukatu, eta ebazpena idatziz komunikatuko zaie interesatuei. Ebazpena aldekoa edo kontrakoa izan daiteke. Kontrakoa izanez gero, eskaeraren balorazioan hartutako erabakiaren azalpena emango da. Aldekoa bada, azokaren inguruko informazioa emango da: kokapena eta instalakuntzaren ezaugarriak, salmenta egin ahal izateko eguna eta ordutegia, baimenaren iraupena eta bete beharreko baldintzak.
Kalitatezko produktuak eta barietatea lortzeko asmoz, lehentasunak markatuko ditu Aulestiko Udalak eta “produktu mota berdinerako puntuazio berbera lortuz gero, postu horien artean zozketa bidez esleituko litzateke baimena”. Horrela banatuko da puntuazioa:
- Herriko artisau/ekoizlea izatea: 10 puntu.
- Produktu ekologikoa: 5 puntu.
- Euskal Autonomia Erkidegoko kalitateko marka babestuak
(Eusko label, Idiazabal, Jatorri deitura, Bizkaiko Txakolina jatorri
deitura, Euskal baserri…): 5 puntu bakoitzeko, gehienez 15. - Titularra emakume baserritarra izatea: 5 puntu.
- Produktuak garraiatzeko ibilgailu elektriko edo hibridoa erabiltzea:
2,5 puntu. - Jasangarritasuna eta kutsadura ekiditeko helburuarekin, ekimena
egingo den puntutik produktuaren jatorria daukan zentrorainoko
kilometro bakoitzeko distantziagatik (beti ere errepide-saretik
neurtua): minus 0,1 puntu. Gehienez 10 puntu kendu daitezkeelarik.
