'Mutriku herri bizigarri' prozesua martxan dago
Energia Trantsizioak eta klima aldaketak dakartzan erronkei erantzuteko prozesua martxan jarri dute Mutrikun. Era berean, 'Asteklima' ospatuko dute urriaren 18tik 27ra bitartean.
Gizarte eragileekin burututako aurrez aurreko elkarrizketa saioa. Argazkia: Mutrikuko Udala. 2024ko apirilean jarri zuen martxan Mutrikuko Udalak “Energia Trantsizioak eta Klima-aldaketak dakartzan erronkei erantzuteko herriaren errealitatearekin bat etorriko zen 2030 urte begirako ekintza-plana”. Lehenengo pausoa diagnostiko bat egitea izan da, “herriaren abiapuntuko egoera zein den ezagutzeko”, eta jasotako ondorioetatik partaidetza prozesua eraman dute aurrera, irailaren bigarren hamabostalditik urriaren hasierara arte. Horrez gain, prozesu osoaren ikur izango den irudia eta lema ere badaukate: Mutriku herri bizigarri.
Parte hartze prozesuari dagokionez, lau denboretan banatu dute: “Irailaren 18an eragile ekonomikoekin aurrez aurreko elkarrizketa saioa egin genuen, eta irailaren 25ean, gizarte mailako eragileekin. Irailaren 26, 27 eta urriaren 2an, Mutrikurekin lotura duten bestelako eragileekin elkarrizketak burutu genituen, online. Eta azkenik, udalak ekintza planaren zirriborroa prestatzen duenean, burutuko dira banakako herritarrei eta sektore ekonomiko ezberdinei zuzendutako online galdetegiak”. 
Mutriku herri bizigarri prozesuaren baitan, “herritarrak sentsibilizatzeko asmoz” podcast desberdinak sortu ditu Mutrikuko Udalak, eta adierazi dutenez,”lehenengo saioa entzungai dago udalaren webgunean (www.mutriku.eus). Hain zuzen, udal webgunean ingurumen arloaren barne atal berezia prestatu da informazio guztiarekin eta sortuko diren euskarri ezberdinekin”.
Asteklima. Urriaren 18tik 27ra bitartean, Eusko Jaurlaritzak bultzatutako Euskadiko Klima eta Energiaren astea den horretan, Asteklima ospatuko dute. Honen harira ekintza desberdinak antolatu dituzte Mutrikun: Argindar faktura ulertzeko tailerra, ipuin kontalaria, ekofeminismoaren inguruko mahai-ingurua eta herri mailako komunitate energetikoaren inguruko proposamena.
Mutrikuko Udaletik ekintzetan parte hartzeko deia egin die herritarrei: “Ekintza orok, txikia izan arren, badu bere garrantzia. Animatu zaitez!”.
